陳柏宇老婆第二胎宮外孕　切除左邊輸卵管保命

歌手陳柏宇與老婆符曉薇（Leanne）2018年誕下女兒Abigail後，一直希望為女兒添多名細佬妹嘅Leanne，日前拍片自爆5月懷有第二胎，但因狂出血及腹部疼痛，睇醫生後證實為宮外孕，因BB着床左邊輸卵管導致輸卵管爆裂，6月即接受緊急手術切除左邊輸卵管。

Leanne憶述當時情況：「我知道有咗之後一個禮拜，我開始出血，腹部都經常痛，日日都有出血，有時少少，有時出好多血。到覆診嗰日，我腹部好痛，我以為自己盲腸炎，直頭想暈低，標晒冷汗，係超級痛超級痛！去到醫院，醫生一照就照到我子宮大量出血，好緊急咁做手術。」

Leanne坦言當時心情低落，曾一度幻想胎兒仍健在：「我好失望、好失落，我真係好想有另一個BB畀Abi…好記得當時做完手術，我諗BB可能仲喺度、可能只係爆咗輸卵管，我畀咗好多可能性自己…」

幸最後Leanne獲一名經歷過兩次宮外孕嘅好友輔導下才走出陰霾，仲話過去一個月已經好似坐月咁好好補身，現時心態及身體狀況已回復正常。雖然之後宮外孕機會會比一般人高，但心態正面嘅佢表示疫情後會繼續努力造人，叫大家唔使擔心。