吳彥祖爆郭偉亮馮德倫嘈大交 張栢芝竟然喺度打木人樁!

2020年08月13日 12:42
東網電視
更多新聞短片
唔知佢哋仲記唔記呢件事呢?
男星吳彥祖長居美國勇戰荷里活,最近接受音樂人好友Jerald(陳哲廬)嘅網台節目《本週Jer住你》分享近況兼大談藝演事業,除咗自揭放棄大陸「金場」返美國發展嘅原因,佢仲爆Eric Kwok(郭偉亮)曾與馮德倫(Stephen)喺謝霆鋒屋企嘈大交,最爆笑係當時舊愛張栢芝竟然匿埋一邊打詠春!
吳彥祖講番同Jerald相識嘅經過,二人初次喺謝霆鋒屋企見面,當時Eric同馮德倫為討論啤牌嘅規矩而嗌交:「以為係講笑嘅,但發展到一個地步係冇人覺得舒服。」雖然過咗咁多年,但Jerald記憶猶新,竟然連爭論話題係「蛇食三條」定「三條食蛇」都記得,仲話聽到有人被摑一巴,然後吳彥祖話:「好似係Eric不斷喺度講笑講笑,然後Stephen突然爆,我識佢咁多年冇見佢係咁,所以我都好愕然,我以為係假嘅添,我以為係玩吓,但我見到佢手震先知係真。」之後霆鋒做強硬「和事佬」,嘗試以怒氣去制止二人繼續爭論,Jerald仲模仿霆鋒當時嘅說話:「你係我兄弟,你又係我兄弟,唔好X嘈喇,得唔得呀!」
正當一片混亂嘅時候,張栢芝竟然喺側邊打詠春木人樁,仿佛活喺平衡時空,場面非常有搞笑。吳彥祖憶述:「你記唔記得霆鋒有啲詠春嘅嘢喺側邊,我記得佢哋嗌緊交嘅時候,Ceci(張栢芝)就喺度練緊詠春,我當時真係覺得好奇怪,唔知發生緊咩事,個個人都鬧緊交,但栢芝喺度打緊詠春個木人樁,我同你好似係唯一正常嘅人。」