34D何泳芍自爆患暴食症：食到嘔為止

藝人何泳芍（Honey）擁有34D心形胸備受注目，現主攻網上做KOL嘅佢，呢日拍片自爆15歲開始患上暴食症，並回想中學時期為咗Keep fit試盡各種減肥方法，加上非常介意旁人目光，但當時因太年輕未有及早求醫治療。

直至去年，為以最佳狀態拍攝無綫旅遊節目《3日2夜》，佢瘋狂減肥節食，暴食症因而再次復發，佢先至發現原來自己患有暴食症。雖然Honey現時仍處於康復階段，但已經有勇氣分享自己嘅病情，並鼓勵同路人要正面面對！

Honey接受東網訪問表示：「其實過去咁多年嚟都有發作過，但一直唔知自己有病，直至上年有三個月不斷餓自己，之後一食就要食到嘔為止。我體重最肥達到110磅，雖然身形唔係好肥，但心理問題就變得好嚴重。」

Honey續指有次步向痊愈階段時，佢以清涼裝束同朋友去行山，點知被朋友狠批要減肥，當佢坦承自己患有暴食症，卻換來一句「做運動減肥啦！」，對於好友只重視其身形並非心理健康，令Honey大受打擊。