天若有情HeHe版　王浩信張振朗朱敏瀚浴池晒肌

藝人王浩信、張振朗及朱敏瀚於無綫劇集《反黑路人甲》中有一場浴池晒肌戲份，劇情講述幾位黑幫猛男於浴場浸浴，打手朱敏瀚差點識穿浩信與振朗的臥底身份，二人即扮HeHe騙他，令對方放低介心。眾男赤裸上身上陣，當中最Fit的是朱敏瀚，八舊「朱古力」盡現，狀態甚佳，難怪監製林志華都公開讚他是努力又專業的演員，看來朱敏瀚之後大有發揮的機會。

朱敏瀚接受東網訪問時表示：「呢場戲係好好笑，本身原裝版本更加好笑，當中夾雜咗粗口，所以刪剪咗。」說到他的身形操得好Fit，與張振朗可說是「黑白雙煞」時，他謂：「咁浩信、振朗嘅角色唔需要咁嘅狀態，劇中我要係最好打嗰個，又要打拳，所以要努力啲。」問有否跟兄弟振朗一齊操肌時，他說：「我依家都有同佢一齊操，因為年尾要拍一套以打拳為題材嘅電視劇。」

此外，振朗與浩信都有一場「天若有情」HeHe版的電單車戲份，只見振朗表情冧爆的從後攬住浩信，真係睇見都都想打佢。振朗受訪時謂：「我個樣其實真係幾引人打嘅，都好呀！如果個對手換咗唔係浩信，我諗我都未必做到，就係想啲觀眾打爆個電視，呢場戲我好鍾意佢游說我，畀佢揸我架電單車，我哋都落咗唔少心機，希望觀眾鍾意。」說到朱敏瀚狀態甚佳，振朗表示：「佢真係好畀心機，佢好勤力，畀到大家睇到有個轉變，我見到佢愈嚟愈Man、觀眾又鍾意佢嘅改變，真係好戥佢開心，之前冇同佢操，但呢排就成日同佢操，見佢多過見屋企人。」