隔離期間一擊即中　41歲尚羚興奮做媽咪

樂隊隊長兼結他手阿正（馮庭正）再做老竇，其馬來西亞環球小姐冠軍老婆尚羚（Sherine）現已懷孕7個月，兩人在馬來西亞隔離期間一擊即中，恭喜！早前阿正陪老婆返馬來西亞家鄉避炎多月，由於當地嚴守社交限制，結果隔離下他們成功造人，趁抗疫期間安胎，待胎兒穩定月前才返港。雖然阿正與前妻育有一對子女，但與尚羚婚後4年，一直計劃生B，再做老竇的他興奮得周圍向友人報喜。

現年41歲的Sherine，現深居簡出，專心安胎，就算出門都只會出入會所，早前她獨自在會所食飯，身材高挑的她，穿起碎花裙，腳踏波鞋，坐着悠閒地撳手機，腹部已明顯隆起。

東網記者致電恭喜，Sherine開心地說：「多謝，好開心，疫情都厲害，所以都小心謹慎，少去人多地方。」疫情關係，加上屬高齡產婦，她說懷孕初時亦很擔心，聽從媽媽吩咐不向外透露喜訊：「我同老公都好想要BB，之前成日飛來飛去，試咗兩年都唔得，點知一停下來就得，真係要Lockdown喺屋企先得。今年係我同阿正結婚四周年，一月時諗住上網搜尋吓買乜嘢禮物畀佢，原來四周年是花果，之後就有咗，覺得好神奇，就好似送咗個BB畀佢做禮物一樣。」問到喜歡仔定女，她直言想要女：「想佢做我朋友，阿正就仔女都鍾意，仔女都開心，但我哋未照，屋企人都未知送乜嘢顏色禮物畀我哋，所以好搞笑，有三、四個人都話要送床，可能唔使分性別啩。」