【疫境自強】蔡毅明搞虛擬時裝騷　慳足一半成本

時裝設計師蔡毅明（Grace）今年推出米奇旗袍，是次是她與卡通人物第二次合作，原定會舉行時裝騷，因為新冠肺炎疫情仍未明朗，造就她舉行「米.旗 20/21系列」網上時裝騷，這個虛擬時裝騷，可謂創香港時裝界先河。Grace說：「我哋喺Studio用綠牆拍攝，用兩位女模特兒，和幾位小模特兒拍攝，佢哋都只係行來行去，因為Studio地方唔大，冇乜角度，之後再做好多後期製作。因為今次做唔到騷，所以構思做一個虛擬時裝騷，我覺得疫情下要自強，我見國際都好少人咁做。（成本平啲？）平一半左右，慳咗場地同部分模特兒，我只用咗兩個模特兒，我個仔就有份出鏡，免費幫我做。」

她說朋友看過虛擬時裝騷之後，反應不一，Grace笑說：「有朋友覺得好新鮮，有朋友就問點解片就咁完，可能始終冇現場氣氛，只係睇模特兒行，我又冇喺時裝騷最後出場，所以跟平日嘅時裝騷唔同。」她設計的米奇旗袍色彩繽紛，展現中式傳統美學，結合中西元素，將旗袍普及化及年輕化。