三個女開「按摩店」　林盛斌揭幕：超平爽皮

新冠肺炎肆虐，本港學校已停課多個月，小朋友長時間留在家中無所事事。身為四子女父親嘅林盛斌（Bob）喺社交網稱三個囡囡足不出戶都能夠自得其樂，仲開咗間「自家按摩店」，非常有心思咁設計咗一張價錢表。

第一位客人當然係老竇啦！Bob趴喺地上面，享受細女嘅大腿按摩，二女負責踩背，而大女就扶實阿妹，安排得好周到！Bob留言：「我估幾個家姐已經無聊到一個極限！佢哋喺屋企開咗一間按摩店，改咗個店名，設計咗個logo，仲要認真到整埋個價錢表……啱啱我試咗個full set，超平，爽皮。」好多網民大讚佢哋好有生意頭腦！