龍小菌情歌落廣告被拒　自爆患創作困難症

歌手龍小菌為樂隊帶菌者主音，上月發布最新情歌《玻璃心》，樂隊先後想在社交網及影片平台賣廣告，新歌MV場景只有電車及銅鑼灣街頭片段，不過疑被政治審查同遭拒絕。小菌更曾向網上平台上訴，最終影片平台放行，但社交網則上訴三次都失敗。

小菌表示佢用『龍小菌』個人專頁落廣告就冇事，但用『帶菌者』專頁就落唔到，對方回覆拒絕理由係「廣告違反規定，廣告不得含有明或暗示個人特質的內容」，其中解釋「個人特質」是指種族、族群、宗教信仰、理念、行為、身心障礙及健康狀況等。

龍小菌指《玻璃心》內容講男女感情，MV的畫面只有電車內談情、銅鑼灣街頭唱歌等畫面，歌曲亦係小菌2016年與外籍男友拍拖時嘅寫照，但戀情僅維持一年。問到歌曲可有弦外之音？鼓手阿布指歌曲只係寫愛情故事，而龍小菌並自爆患創作困難症，加上擔心疫情等因素，所有嘢加埋產生心理恐懼。作為公眾人物，龍小菌直言驚畀人話，依家每做一件事都要諗得好清楚，更會自我監察。

小菌接受東網訪問說：「首歌同微電影完全無政治訊息，只係一個愛情小品，但係好多時喺解讀嘅人身上，到底係咪有政治訊息囉！個社交平台無解釋點解拒絕我哋，我都落咗三次都畀佢拒絕，試過申訴冇回覆，我都冇再落廣告喇！」而阿布則笑說：「其實我唔知道社交平台制度係點衡量，可能係歌名敏感，或者疫情關係？我哋個名又叫『帶菌者』唔知係咪因為咁敏感，其實我哋個歌名字眼好普通，唔需要聯繫太多。」