【3個月前發現肺癌】86歲譚炳文病逝
播音皇帝鍾偉明徒弟、有「配音王」之稱的譚炳文,3個月前發現肺癌,昨晚因呼吸困難入院,經診治後今早11點離世,終年86歲。而昨日譚炳文女兒譚淑瑩在社交網表示,自己為父親推掉兩個配音工作,望疫情過後再出關。
譚炳文今年5月剛續約無綫配音組,6月才發現肺癌,之後癌細胞急速擴散。佢曾接受電療,心願更想今年搞多一次生日會,惜事與願違。近月定時到醫院檢查,惟昨晚呼吸困難,12點由白車送入律敦治醫院,至今早11點離世。
譚淑瑩稱父走得安詳,現安排了法師到醫院為父諗經及準備後事。
據知,譚炳文生前未有告知朋友自己得肺癌,只係成日話腰好痛,有朋友介紹骨科醫生畀譚炳文,之後轉介瑪麗醫院後,檢查出肺癌擴散到骨,為癌症晚期。
女兒哭成淚人
譚炳文女兒譚淑瑩今日1點40分,離開律敦治醫院,並在四名親友陪同下受訪,但神情憔悴,更多次哭成淚人:「好突然,我完全冇心理準備。(整件事係點?)開頭我哋以為佢骨痛,帶佢睇骨醫,係突然間,發現原來佢係癌症擴散,但係年紀大都可以做得到,咁去瑪麗醫院做咗電療,電療完之後唔痛,但之後活動能力就弱咗,本來活動能力弱咗,係要時間去修復。每逢星期五,都要返葛量洪醫院覆診,醫生話如果OK就畀佢返屋企,因為佢想返屋企,咁睇完之後係冇嘢,唔使住一日。點知突然間夜晚12點,佢抖唔到氣,咁冇辦法,我Call白車送佢入醫院,如果係咁,咁喺葛量洪我就唔同佢出院,等到凌晨3點,本來醫生都話可以返屋企,等今朝7點幾話佢抖氣唔OK,要我哋即刻嚟,太突然我未接受到,我以為佢都可以at least(捱到)一兩年、或者多幾個月。」
譚淑瑩指爸爸剛剛與無綫續約,其心願希望可以繼續履行工作:「佢個腦係清晰,聽到我哋講到咩,活動係慢咗,我真係接受唔到,我真係好唔捨得佢。(佢走嗰陣屋企人喺齊到?)喺齊到。(頭先搵法師幫佢頌經?)係。(佢有冇咩心願想你哋幫佢完成?)佢之前已經講晒,佢係好well prepare,之前已經全部講晒,呢個袋就係佢平時返工用嘅袋(意思爸爸想履行工作)。(身後事安排好?)未安排。(依家去搞?)返屋企部署吓先,應該都係用佛教,但係乜嘢都未做到,因為今日係禮拜六,要等下星期三先安排到。」
譚淑瑩透露炳哥早在多年前,在加國以3萬多元加幣(約17萬港元)買了山地,準備過身後土葬,惟近期新冠肺炎疫情問題,要將遺體運返加國有點難度,她謂:「了解吓手續點辦先,如果唔得惟有喺香港火化,順其自然!(遺願?)我就好遺憾未能同佢合演電視劇,因為之前話一齊拍《愛.回家之開心速遞》,但一直未有劇本。」
無綫電視亦發文悼念譚炳文,文中表示會盡力協助其家人辦理後事,提供適切協助。