胡蓓蔚為老公送住家飯入電視城　《愛回家》上下勁哄動

喺劇集《愛．回家之開心速遞》飾演「熊樹仁」嘅單立文，同老婆胡蓓蔚結婚多年，非常恩愛。近日趕拍《愛》劇嘅佢，仲獲對方人肉速遞送飯入電視城添！

原來單立文睇錯通告返唔到屋企食飯，胡蓓蔚即煮埋飯兼化身「外賣妹」，成班《愛》劇演員周嘉洛同呂慧儀等，見到胡蓓蔚送飯嚟即時起哄，可憐嘅呂慧儀同蘇韻姿都係食杯麵做晚餐，胡蓓蔚聽到即刻叫大家一齊食，非常有愛，唔少網友都大讚佢好老婆呀！