趙學而挑戰Hip Hop嘆好難：半百先嚟學新嘢！

歌手趙學而為ViuTV音樂節目《Chill Club》擔任主持，表示今次第四季主持會有所不同，主持是輪更形式，作此安排都是順應民意，騰空多些時間給嘉賓唱歌，主持唱少一點，都是件好事。問到唱少了可會不夠過癮？她謂：「唔關事，唔同風格嘅歌都可以唱到，今次就係Hip Hop，係大挑戰，難到爆！我Hip Hop節奏感唔強，雖然我平時都有聽K-Pop，但唔等於Handle到，估唔到半百先嚟學新嘢，但最緊要畀到觀眾同我哋新鮮感。」

講到近來圈中不時出現夫妻婚姻出現問題的報道，問她與老公怎樣維繫感情？她坦言：「每對Couple都有唔同相處方式，不過開唔開心、關係點樣都係兩個人嘅事，其他人唔好講太多，我自己就非常穩定同開心。」她又笑言與老公相處方式獨特：「我哋好鍾意鬥嘴，無論開唔開心都唔會屈喺心度，一定要講出嚟，溝通好緊要。（會唔會Check住老公行蹤？）唔會。（好放心佢？）冇意思如果去到呢步，大家互相信任同空間好緊要。」