【花百萬胸無寸進】林穎彤想變高 王卓淇最想整…

2020年09月15日 21:00
東網電視
更多新聞短片
有時都未必「大」晒!
唔少女士為求「變大啲」而接受後天加工,不過有錢都未必成事,消委會就表示接獲豐胸療程投訴增加兩倍,女士花百萬「胸無寸進」,嘥錢又嘥氣!女士除咗想隆胸部,有時都會想執吓其他部位!林穎彤:「最唔滿意自己嘅高度,因為得160cm,如果做嘢嘅時候想有壓場感啲,就可能要着比其他人更高嘅高踭鞋,唔係嘅話就會凹咗落去咁!同埋拍嘢嗰陣,如果遇到啲男仔好高,而又要拍Two Shot嘅時候,會變咗影到佢個頭,但你又跌咗落去,影唔到你喎!咁就會特登畀個箱我企,唔夠高呢樣嘢會造成工作上嘅麻煩,所以我最希望改善嘅係高度,但以我所知,依家係冇整高高度嘅技術,所以冇辦法,會去接受、欣賞自己呢個特色。」
王卓淇:「我覺得女仔整容隆胸係冇問題,覺得靚就OK,我自己未有呢個諗法,我知道我身材未必係最好,但係好滿意自己。如果我真係要整,我諗我會整個鼻,因為我想要個好高好直嘅鼻,但一直都係得個諗字,冇真係去做,因為屋企人都好反對。」
蔣家旻:「對自己都好滿意,所以都冇邊個部位想改變。不過自己都有個缺點,覺得個肺、橫膈膜比較闊,就算好瘦,只要着中腰褲就會畀人錯覺冇乜腰形、同身形好闊。有啲女仔橫隔膜窄,就算條腰唔係好幼,都會覺得佢好瘦,但呢樣係天生,就冇得去改變。」
菊梓喬:「豐胸冇效嗰個女仔都幾慘喎。我覺得每個女仔,尤其做幕前,初時可能覺得自己冇乜唔好嘅地方,但係上鏡上得多,睇睇吓,又會覺得自己外表可以好啲、再好啲。我最大問題係唔可以用錢解決嘅,因為我覺得自己細粒咗啲,如果我對腳可以長多6吋就好啦,但呢件事係冇可能發生㗎嘛,所以覺得自己可以keep依家嘅最好狀態就可以啦。」