祖兒為霍汶希煮三餸一湯　扮霆鋒Chok住灑鹽

天后容祖兒（Joey）同經理人霍汶希（Mani）感情要好，呢日Joey忙完一整日嘅工作，化身「廚娘」以一身運動裝為Mani下廚煮素菜，非常有心！

佢一個人煮香辣土豆絲、涼拌茄子、手撕包菜同埋冬瓜菌菇湯，雖然要睇住食譜嚟煮，但過程都冇乜驚心動魄，似乎平時都有入去廚房，當佢切開茄子嘅時候，笑言謝霆鋒見到佢咁，可能會噴煙：「如果謝霆鋒看到我這樣的話，他的頭頂都噴煙了！」之後又見佢扮謝霆鋒Chok爆灑鹽，雖然望落好似玩多過煮，但獲Mani大讚好好食，最後兩個人更撐枱腳共度晚餐，非常溫馨！