林志穎大仔11歲生日　自訂賽車主題玩足12個鐘

台灣凍齡男神林志穎與老婆陳若儀育有三子，2013年曾與大仔Kimi參加內地真人騷《爸爸去哪兒》，人氣高企，成為唔少網民力捧嘅星二代。不過始終Kimi年紀仲細，作為爸爸嘅林志穎希望佢專注學業，暫時讓兒子「息影」。

要睇Kimi近況就要追蹤兩公婆嘅社交網，尋日係佢11歲生日，林志穎上載阿仔許願相，雖然睇唔到正面，但見得Kimi已長大咗好多，林志穎透露早前發現有近視，令到Kimi好擔心，佢留言：「11歲的kimi 11歲的他，依舊有着童心很認真的許願，他祝願疫情能早點過去能全家旅行，祝願爸爸媽媽身體健康，（因為之前一起去檢查視力知道我有了近視，一直很擔心），第三個他許在心裏面，小男孩長大囉，祝你生日快樂。」而陳若儀就晒出生日會相片，表示派對主題由Kimi自訂，見佢身後有一架真實比例嘅跑車，可見熱誠度同爸爸一樣高，果然有其父必有其子，仲話佢由朝早10點玩到夜晚10點，相當精力充沛！