歐信希翻唱歌《默默向上游》 吸4萬點擊!

20200917
東網電視
更多新聞短片
歐信希話估唔到反應咁好。
歌手歐信希(Simon)日前推出由原作曲人顧嘉煇徒孫Allan Lau重新編曲,向已故偶像張國榮致敬的翻唱歌《默默向上游》,自本月9日推出至今日為止,收看次數逾4萬次,反應理想。
Simon受訪時表示:「我都等咗好多年,終於等到我唱片公司風行畀機會,聽經理人MiMi講,喺網上平台收看次數直逼5萬,真係好多謝fans嘅支持,坦白講,過去我真係未試過有咁好成績,個MV策劃就係我經理人,導演就係得獎電影導演吳浩然,導演要我喺MV度,飾演一位作曲家同歌手,首歌加咗管弦樂嘅協奏,仲請埋豎琴演奏師為我彈琴,令整個MV都好唯美,同埋啲MV道具,有啲真係喺歐洲訂返嚟,部分仲係百年歷史嘅古董,所以我覺得個MV真係好珍貴。」
問到對《默》有何展望?他說:「首歌我用咗好多心機、時間去唱、去做,我希望會有更多人用心細聽同鍾意,最好梗係可以喺音樂流行榜上獨佔鰲頭啦。」Simon又說為得到更多支持,現開出「期票」:「11月推出專輯前,我要減到25磅,要畀大家睇到我努力嘅決心。」