【昔日情侶】台灣當紅藝人破冰和解哄動娛圈

2020年09月17日 15:00
東網電視
更多新聞短片
佢哋個個都好紅!
台灣多棲藝人黃鴻升(小鬼)昨日驚爆離世,消息震驚中港台,其舊愛楊丞琳更傷心欲絕徹夜難眠。唔少人都話「男女之間冇純友誼」,但呢對昔日情侶就否定咗呢句說話,其實喺台灣娛圈都有唔少當紅明星再見亦是朋友!
天王周杰倫(周董)同天后蔡依林(Jolin)無論身份定地位都非常匹配,兩人2001年認識,雖然一直冇認戀,但拍拖已經係公開的秘密!不過直到2005年,周董被拍到與侯佩岑勾肩約會,令呢段「雙J戀」正式玩完!Jolin事後憔現身,更形容「這是我談過最誇張的戀情」。分手5年後,Jolin竟為對方擔任演唱會嘉賓,世紀合體令人驚喜萬分,翌年兩人互換角色,喺台上更有親密互動!2013年,兩人喺《金曲獎》上同台,不過當被叫擁抱時就當聽唔到!而最近一次兩人合體就係喺澳門一個頒獎禮上,但咁啱李宇春夾喺兩人中間,全程冇交流!如今周董同昆凌一家四口有兒有女,相反最近40歲生日嘅Jolin自2016年同錦榮分手後都冇新戀情,網民都祝福佢早前搵到Mr.Right呀!
同係靚仔靚女嘅林志穎林心如1995年合拍電影《校園敢死隊》結緣,隨即擦出愛火,當時林志穎父親曾暗示林心如係仔仔唯一帶返屋企嘅女朋友,不過隨着男方入伍當兵,女方去大陸拍戲,分隔兩地最終分手收場!相隔20年後,林志穎爆出分手內幕,直言:「林心如哪都好,就是異性緣好到離譜。」不過如今兩人都各有家庭,生活幸福,林志穎早前更上載同林心如老公霍建華合照!
徐熙娣(小S)同黃子佼都係知名主持,兩人拍拖4年多2000年分開,有傳男方以愛上曾寶儀為由向小S提出分手,爆出三角戀,兩人不歡而散。2005年,小S與另一半許雅鈞修成正果拉埋天窗。直到2015年,黃子佼上小S主節嘅《康熙來了》握手攬攬喊住和解,成功破冰!而黃子佼今年3月就同細19年女友孟耿如結束7年愛情長跑註冊結婚,大團圓結局!