《花木蘭》替身睇得又打得　網民讚顏值比劉亦菲高！

電影《花木蘭》（Mulan）受新冠肺炎疫情影響多次延期上映，大前日（17日）終於喺香港上映，內地女星劉亦菲女主角寶座得來不易，擊敗近千位對手，爭奪成為第一位中國迪士尼公主，為演出除咗犧牲靚樣素顏上陣，九成嘅動作場面都親身上陣，餘下一成由替身完成，認真搏到盡。

近日有網民發現幫劉亦菲做替身嘅演員，除咗身手了得，樣貌仲標緻可人，大讚係楊冪同「阿嬌」鍾欣潼混合體，比劉亦菲更搶眼喎！呢位靚女替身隨即被起底，名為劉亞希，社交網有6萬粉絲追蹤人數，不時上載拍攝花絮同大家開心share，見佢着起花木蘭古裝造型英姿颯颯，勁有台型，同其他動作演員打起上嚟仲拳拳有力，絕對唔係借位！有指劉亞希除咗《花木蘭》外，亦參演過成龍主演嘅《急先鋒》、郭敬明執導嘅《陰陽師》及《狄仁傑之四大天王》等多部電影。

唔少網民希望佢正式出道做演員，但見佢嘅個人簡介自稱「一個為生活努力奮鬥中的小堅強。求放過勿給我過多關注」，似乎唔太願意成名，唔知粉絲等唔等呢一日呢？