譚炳文設靈　眾星寫悼文宇宙大王送最後一程

有「配音王」之稱的譚炳文於本月5日因肺癌病逝，享年86歲，今日假紅磡世界殯儀館地下世界堂舉行設靈及追思會，女兒譚淑瑩及親屬一早到場打點，兒子譚廣銘一直陪伴在母親身邊。約下午二時十五分，有近十名喇嘛拿着祭品為誦經儀式作準備。

靈堂以簡潔為主，中央橫匾寫上「永遠懷念」，而兩側橫匾分別是「德高望重」及「福壽全歸」，靈堂照是譚炳文的一張彩色相，笑容祥和，該照片是譚炳文於2014年《萬千星輝頒獎典禮2014》中獲頒「萬千星輝演藝人大獎」時接受TVB周刊訪問時拍攝。

現場有電視播放着譚炳文生前的演藝片段，並安排了一千五百本由無綫製作的紀念特刊方便出席悼念的親友細閱。特刊收集了譚炳文多張極具紀念性的相片外，還刊登了家人、汪明荃、薛家燕、古天樂及朱咪咪等撰寫的悼文。

譚炳文生前的工作涉獵範圍甚廣，花牌除了子女、胞弟、胞妹及契女李麗霞（黑妹）之外，還有粵劇大佬倌龍貫天、羅艷卿、陳寶珠、李香琴、羅家英、汪明荃等，而影視界藝人古天樂、鄭少秋、姜皓文夫婦、錢嘉樂夫婦、杜琪峯夫婦，以及TVB粵語配音組與EYT（《歡樂今宵》節目）好友會等，而最特別的是以譚炳文經典配音的卡通人物「宇宙大王」為造型的花牌，由李香琴契仔陸永昌敬輓。

女兒譚淑瑩於下午五時許接受傳媒訪問，感謝各人冒雨致祭：「今日採用密宗佛教儀式進行，因為爸爸都係皈依密宗嘅師傅。」問到母親心情？她說母親比自己堅強：「可能佢內心好傷心，但佢冇表現出嚟，比較冷靜，可能我比較脆弱，呢廿幾年我日日陪住佢，心情比較複雜，因為我一路陪住佢，同佢食飯、登台、去醫院都係我陪佢，唔係好捨得，但我今日都要好堅強，因為師傅話如果你想爸爸去到西方極樂世界，你已經誦咗咁多經，佢已經可以去到嗰個位置，你傷心，佢唔捨得你，咁佢落返嚟就前工盡廢，所以我今日要好堅強，幫佢完成呢個Party，等佢開開心心見番所有親友做好呢個喪禮。」

由於疫情令部分親友未能回港：「好遺憾，佢哋都有留言同埋有啲說話Send畀爸爸，爸爸個電話我仲有Keep住，我冇熄機，我仲當佢喺我身邊。」她相信已達成譚炳文的心願：「佢最緊張自己把聲，佢病嘅時候如果冇聲或者聲沙，佢好緊張。佢臨離開嗰日都仲係講到嘢、食到嘢，係瞓着覺咁走，辛苦掙扎插喉全部都冇，呢個係佢最大嘅心願。（佢有個心願係做生日？）呢個喪禮就當係，因為生日我真係無能為力，所以今日呢個喪禮就當係Party來做，希望大家笑着送佢一程，等佢開開心心去西方極樂世界。」

至於陪葬品，譚淑瑩稱準了爸爸生前喜歡的衫褲鞋襪：「佢成日着嘅羽絨褸，一件佢好鍾意嘅綢仔，佢話好靚，只係着過一次，最緊要係佢配音嘅耳塞，登台嘅眼鏡。」而靈堂照片，家人有份選擇，是爸爸生前獲獎的相片：「因為佢好鍾意獎牌，所以用咗嗰張相。」

另外，問到李香琴是否知道譚炳文去世一事？她說：「佢屋企人應該有同佢講，但我唔知佢知唔知，因為佢年紀大未必知。」

而謝賢約下午五時許到達靈堂，逗留25分鐘離去，問跟譚炳文的難忘事？他不願多談：「唔講喇！講嚟講去都係嗰啲嘢。」

羅蘭與胡楓約六時半冒雨現身譚炳文的追思會，兩人神情哀傷，受訪時一度眼濕濕，問到心情平復沒有？羅蘭嘆了一口氣及搖頭：「我諗佢都唔知自己有癌症，之前話係心臟有問題。（同佢有咩難忘事？ ）好多，當年一星期做三日EYT，有時見足五日。（好唔捨得？ ）冇辦法，人生嘅嘢。」至於胡楓透露跟譚炳文相識多年，入行前已經認識： 「當年佢做珠寶，有個工會，我經常去公會，同佢一齊打乒乓波，所以佢唔喺度，我非常難過，知道佢有長期病患，但唔知道佢有肺癌。」

至於譚炳文生前好拍擋李香琴則由女兒蕭紫筠代母到場致哀，問到有否告訴母親有關譚炳文離逝的消息，蕭紫筠表示：「有同佢講，但佢精神有啲問題，思想有啲差異，話咗畀佢聽，佢冇乜表示，佢唔知道自己老拍檔走咗，老拍檔一直喺心中。（媽媽身體點？ ）幾好，只不過唔係好記得嘢，好似小朋友咁，佢好開心。（有冇掙扎過唔同媽媽講佢老拍擋離逝？）唔使掙扎，你講佢就聽，好似小朋友咁，好聽話。」

薛家燕受訪時強忍淚水，她說：「其實佢都係笑喪，80幾歲，佢個女同我講佢走得好安詳。依家諗佢係去咗極樂世界同埋走得安詳。佢對演藝界好大貢獻，佢嘅笑聲同獨特嘅聲音永遠係我哋心中，永遠懷念佢。佢積極嘅人生態度經常鼓勵我哋，大家要堅強同珍惜眼前所有嘅。」

其他來賓包括尹飛燕、吳雨、鮑起靜、吳麗珠、甄志強、無綫高層李寶安、杜之克、余詠珊、何哲圖等。