唔驚同男友同住難！張曦雯自爆情陷三角戀

藝人張曦雯（Kelly）下午為健身室擔任剪綵嘉賓，席間她透露自4月拍畢《踩過界2》後，一直處於休息狀態：「好享受喺屋企Hea，都有間中做運動拉筋嘅，不過健身設備唔齊全。男朋友有叫我去行山，不過我怕曬黑又怕熱。」

問到她是否已展開同居生活，她大方承認：「係，但又唔算完全同居，係因為我啲貓貓狗狗需要人照顧，工人姐姐又唔係好識，佢咪過嚟幫我睇囉。（唔驚相見好同住難？）唔會啦，如果要鬧交平日都可以，我哋兩個嘅相處比較和平，好少拗撬。」

她透露下月開始為《白色強人2》開工：「呢排都開始試造型，同埋拍吓預告、熱吓身咁。依家劇本都出到廿幾集，可以有充分嘅準備。今次故事係兩年之後，我會同郭晉安及陳豪有類似嘅三角關係。（好沉重？）應該係輕鬆嘅，好多角色好詼諧，相信會睇得好開心。」由於有唐詩詠及胡定欣等等坐陣，Kelly對該劇開拍相當期待，認為應該「好好玩」。