【唔怕寒涼】莊思敏想生仔唔避孕仲食大閘蟹？

藝人莊思敏出席首映禮，她透露中秋與兩位妹妹及朋友團圓食盆菜，老公喺台灣已兩個月冇見，疫情期間嚟過香港兩次，逗留個幾月，之後返去隔離咗兩次，問到見面有冇密密造人？佢話：「隨緣，隨意，睇心情，冇特登去諗，如果有就有，冇避（孕），但啲人話食大閘蟹難啲。（咁唔好食？）唔得，今年要食。（要大閘蟹唔要造人？）食埋今年先，已經冇得去旅行，連大閘蟹都冇得食就好慘，老公冇好心急話唔畀食，佢可能都唔知食大閘蟹有影響。（你都唔細？）都係，睇身體狀況。」

問到有指阿妹莊思明?得男友楊明好實，跟住喺網上開火嬲有人博宣傳？佢話：「佢畀我更火爆，我已經收咗火。（阿妹成日監場？）應該冇啩，以我所知有佢場口先喺度。（阿妹性格係咪覺得抵鬧就要鬧？）我覺得有啲嘢私底下可以溝通就私底下溝通，不過佢都係衝動嗰班。（佢係咪mon得楊明得好實？）咁我唔知，我又唔係阿楊。（楊明最近點？）唔講佢啲嘢啦。」