【婚前自挖傷疤】何雁詩揭小三真相 爆鄭俊弘承諾「贖罪」

2020年09月23日 00:01
東網電視
更多新聞短片
何雁詩婚前剖白心聲!
守得雲開見月明,一直不被睇好的何雁詩及鄭俊弘(Fred)今年11月就會拉埋天窗。曾被封「小三」的阿詩3年多前戀上Fred鬧得滿城風雨,她趁婚前接受東網訪問,首次自辯:「當時自己係不知情,但亦冇得狡辯。」當年公開戀情前,Fred被爆有位拍拖3年的未婚妻,她坦言當時大感錯愕:「成個人係咁震震震,Shock㗎!我都係早傳媒一、兩日知道,當時Fred有打畀我講呢件事。(佢知畀人爆大鑊?)我唔知點解佢會講,當時佢同我講:『你諗吓啦!』」
情緒病復發
阿詩受千夫所指導致情緒病復發,病情一發不可收拾,當時雖有接受治療,但仍不堪壓力,傳出醉酒割脈自殺入院,現時手上疤痕仍在,但她直言心病已愈:「過咗去我冇諗啦,同啲唔好嘅新聞一樣,過咗去。我依家更加識得點樣處理情緒,呢樣先最緊要。」並透露現時情緒穩定,沒必要經常提起不快事:「我經歷過乜,學習到就夠。我會在意對自己有價值嘅嘢,做好自己。」
身心受創的阿詩因深愛Fred,選擇原諒對方:「既然揀得同佢一齊,無謂再責備佢,因為開始Blame人,就會慣咗咩都話佢,咁樣大家唔會開心,又會嬲豬,過咗就算。(選擇忘記?)忘記唔到嘅,但我選擇Focus喺依家。」她承認以往疑心重,但現時對男友百分百信任,全因當日Fred自知這段戀情對兩人的事業有很大影響,曾向她作出承諾:「佢意思係『做過嘅過失,會努力彌補番。』」自此他們就絕口不提舊事,這亦是雙方相處之道:「唔好將啲負能量拎出嚟講,唔好發大。」
做好自己「洗底」
當年盛傳因阿詩情緒失控,所以沒公司敢與她簽約,她承認受傳聞所傷:「我承認係一個好多情緒、好多感覺嘅人,呢行好多人都係咁,只不過標籤咗我,點解要咁?我覺得不受尊重,有少少Insulting(侮辱)。呢個係病嚟,唔係我揀,其實情緒病就好似感冒咁。」
現時作為獨立歌手,阿詩創作新歌《絕望時請點播》時,不停回想過往經歷的高山低谷。面對慣性負評,她勇於承擔,亦學懂樂觀面對:「冇得擔心、冇得洗白,搜尋『何雁詩』三個字已經出晒嚟,我只可以做好自己專長嘅嘢,好似打Golf、做音樂,希望有多啲好嘢畀大家記得,唔係淨係記得啲負面嘢。」
阿詩與Fred攜手共渡難關,大讚對方是與她最夾的男友,說時不禁甜笑:「佢畀我感覺到,既係好朋友,又係我另一半,好似Puzzle(砌圖)咁,如果唔係都唔嫁畀佢啦!」她坦言當初被「睇死」,卻無損兩人熱戀:「我哋一直睇好呢段關係,一開始已經感覺到相處好合拍,面對各樣事情嘅反應都相似,冇乜其他壓力影響到我哋對呢段關係嘅信心。」
場地:GATEWAY@MARCO POLO HOTELS