率先體驗!新派電競館玩住Keep Fit

2020年09月23日 12:45
東網電視
更多新聞短片
「E-Rowing」划艇最以4個人一齊玩,練到心肺功能,女士們減肥必玩!(胡振文攝)
疫情稍有放緩,體育館、健身室都告重開,一眾懶鬼再無藉口不做運動。只不過,一支公做運動既沉悶又無挑戰性,有無方法可以好玩啲?最近於尖沙咀新開張的「AME運動電競館」就為運動注入新樂趣,Model話玩上癮,即睇!
運動團隊協力開發
這個電競館佔地3,400呎,創辦人指共用了兩年時間籌備,並投資了8位數字興建。跟其他電競館重點放在打機不同,它的賣點是鼓勵玩家做運動,內裏有多個設施訓練玩家的體能、耐力、速度及團隊合作能力,而且每個項目均由運動科學團隊Fitzio Fitness協力開發,以運動醫學知識及臨床經驗,為參加者提供賽後訓練建議及科學數據分析。
5大電競項目
入場前要先登記個人資料及製作專屬圖像,之後系統會自動量度玩家的身高體重,並製作出個人QR Code方便記錄運動數據。場內共有5大運動電競項目,包括與美國國家滑雪隊同款的訓練設備「E-Skiing」、內藏過千枚感應器的智能沙包「E-Boxing」拳擊運動、以維港景色為背景的「E-Rowing」划艇、模擬灣仔至中環單車公路賽的「E-Cycling」,以及由英國引入、國際認可策騎體驗裝置「E-Racing」。每完成一項,均會獲得各項體能數據,運動成果會儲存於「AME Platform」雲端,累積經驗值就能賺取GG Coin換領獎品。
VR划艇最好玩
講咗咁多,實際玩落又點先?Model就話划艇最好玩︰「首先佢要戴VR眼罩玩,玩時第一身睇到維港景色,配合模擬水阻,比喺健身室投入好多。」要用到VR眼罩的還有策騎機,以沙田馬場做背景,鬥的是2,200米長途賽,玩時要半蹲起勢猛搖,不但練到臂大肌、四頭肌,就連ByeBye肉都練到,女士減肥必玩;但留意此項目亦是最辛苦,記得做定熱身同留前鬥後啊!其他項目如單車機亦好過癮,踩得快固然重要,賽道上還不時出現加速、令對手減速等道具,十足「孖寶賽車」,少啲策略都唔得!至於拳擊及滑雪機,前者要對準感應器出拳,後者則透過擺動身體取得旗仔過關,同樣講求協調性及平衡力,但挑戰性就無其他三項咁大,無錢無時間可以揀項目來玩!
AME運動電競館的入場收費模式分為「單人模式」 及「全民運動會」競賽模式,「全民運動會」參加團隊的成績將會記錄於積分榜,與其他團隊爭奪殊榮。場館更指將來還會舉辦盃賽,並會引入如滑浪、短途策騎等更多項目,好動一族要Keep住留意喇!
亞洲體育電競《AME 運動電競館》
地點︰九龍尖沙咀中間道 15 號 H Zentre UG 層 2 號舖
(港鐵尖沙咀站 L1 或 K 出口)
開放日期︰2020 年 9 月 23 日至 2021 年 6 月 30 日
開放時間︰上午 11 時至晚上 11 時
預約網址︰https://www.ame.gg/