郭富城又落老銅 一家四口行維園賞月甜爆

20201002
東網電視
更多新聞短片
果然去銅鑼灣撞天王嘅機率都幾高。
尋晚中秋佳節,天王郭富城(城城)做啲乜?其實城城平時收咗工,除咗係打邊爐,同埋都係打邊爐之外,話晒依家有兩個寶貝女,當然要抽時間湊吓女,仲會親自揸架價值超過200萬嘅辣跑林寶堅尼,落銅鑼灣幫囡囡買尿片。
話說尋晚城城又落銅鑼灣,不過唔係買尿片,而係帶埋太太方媛同兩個囡囡「大寶」同「二寶」去咗維園,一家四口手拖手,一字排開築起人鏈,喺草地嚟個飯後合家歡散步,一路行一路賞月。
網晒全家福嘅方媛,仲晒咗張同城城頭貼頭自拍照,放閃放到唔少網民話好羨慕,讚城城夠晒浪漫同埋係顧家好男人之外,更有好多粉絲話早知城城去維園,一定要同佢一齊「食燈籠玩月餅」,藝人陸浩明留言話:「Woooo...偶像喺維園?早知我都去賞月,so sweet!」
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc