菊梓喬畀黐線男友激到窒息 甄詠珊無辜被EX鬧一餐

2020年10月04日 22:00
東網電視
更多新聞短片
遇着另一半無理取鬧,真係好辛苦!
一名台灣女性在網上哭訴被男友分手,只是因為一起吃麵時意外加了芫荽,引發熱議。圈中藝人又有冇遇過男友、女友或前度,最無理取鬧或無聊嘅經歷呢?
「星夢一姐」菊梓喬(Hana)曾經遇過一個無理取鬧的男朋友,她說:「嗰個人好double standard(雙重標準),佢要求你做嘅嘢,佢自己唔做,我就覺得好荒謬!例如佢自己返到屋企,佢唔會話畀你聽嘅,但你返到屋企,你唔話畀佢聽,佢就會鬧爆你,乜嘢都係!如果佢自己出去同朋友食飯或者做咩,可以唔使講嘅,冇影都得嘅,但掉番轉你同朋友食飯,你冇話畀佢聽,佢就會發癲、鬧到黐線!佢嗰隻大男人係好無理取鬧,好怕double standard嘅人,荒謬到點解可以咁,我係一個唔會管束男朋友嘅人,亦唔會刻意去check佢任何嘢,我覺得兩個人相處最重要係舒服囉,但佢會掉轉管住你,我覺得好窒息。」
女星甄詠珊大爆與一個EX的經歷,她說:「當時佢揸車去一個地方我哋冇去過嘅地方,所以我哋要用導航,我喺隔籬開住個導航,一面講畀佢知點行,後面仲坐住我哋啲朋友,中間有段時間,唔知個導航係咪接收得唔好,行錯咗條路,跟住佢就鬧我囉,指住我嚟鬧,好粗暴!好無理,當時我覺得點解關我事呢?好似我做咗啲咩咁,一路鬧到去目的地,都有成十幾廿分鐘車程,事後個朋友都問番我,點解個導航錯都鬧你嘅。」
女星黃榕也曾有個無理男友:「以前我好鍾影相,試過同一個甫士,放咗十幾張相到社交平台,不過冇性感、冇長腿喎,但我男友就鬧我,點解成日放咁多張、同一個款式嘅相上網,之後仲嬲咗我,我解釋話唔同動作,有叉腰、托腮係唔同款㗎,佢咁樣管住我放相,我覺得佢好無理取鬧!」
蔡嘉欣曾經有個保守男友,她說:「以前10幾歲做model時,當時嘅男朋友好緊張我工作上嘅衣着,有次工作我要着件Tube dress,其實我覺得都頗為保守,只係一條露膊頭嘅裙,加上自己身材又冇咩睇頭。但係當時男朋友就十分之介意,仲因此提過分手,不過佢只係晦氣說話。」
ViuTV小花張凱娸(KiKi)笑言曾與男友因玩遊戲「狼人殺」而鬧交:「有次我哋玩狼人殺,嗰Round我做狼人自殺,點知女巫冇救到,之後我就同佢因為女巫應唔應該救人呢樣嘢,而嗌咗一場大交。我覺得遊戲規矩係救人比較好,佢就覺得人哋點玩有自己嘅自由,當時大家都太認真,但依家諗番起其實好無聊。」
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc