【娛刺撈飯】被認錯楊冪嬲爆 趙麗穎小題大造

20201005
東網電視
更多新聞短片
被人認錯咁大件事,趙麗穎可能寧願撞鬼喎!
「I DON'T BELIEVE IT,是我『恍似』了你。」台灣組合優客李林,29年前嗰首《認錯》,依家聽番都真係唔覺過時。事關做錯嘢,未必會有人認錯,但面盲症,將許志安認錯咗做杜德偉、將拖住老婆方媛嘅Aaron,當咗係Leon嘅CASE呢,就一單又一單,試問嬲得幾多吖。
話說內地女星趙麗穎,多次被「認錯」咗做楊冪,穎姐甚至㷫到喺社交網爆Seed鬧爆「粉絲為甚麼要把我和楊冪認錯」。唉!女人最棹忌就係被人認錯,趙麗穎嬲嬲豬都係可以理解嘅,之不過呢單嘢嘅性質就有少少唔同喎,事關有可能係一次、粉絲向藝人嘅反向教育呀!
係人都知啦,楊冪4歲就出道做童星,2011年憑古裝劇《宮》爆紅,影視作品不計其數,觀眾對咗佢三十年都唔厭,證明咗冪姐有一定嘅實力同觀眾緣。反觀穎姐,2011年《新還珠格格》後叫做開始多咗啲人識,但因為一次被遊客喺拍攝現場,嗌咗佢做「楊冪」啫,就㷫到上網鬧神鬧鬼。喂,楊冪被疑似「惡意代拍」鬧「垃圾」,反應都冇咁大喎!再講,以當年趙麗穎嘅名氣,遊客一時認唔出佢,都合情合理啫。
就算趙麗穎真係好唔開心被人認錯咗,係咪都可以有一個好啲嘅處理,展示一吓應有嘅IQ同EQ呢?譬如話,聽到有人喪嗌自己做「楊冪」,係咪可以擰歪塊面呢?咁嗌嗰個見你畀個咁嘅反應,理論上應該會好冇癮,繼而就好大機會會認為:「楊冪都幾寸喎!」即係咁,成單嘢明明唔關自己事,冇理由自己受晒㗎,係咪呀?就算後來有人挖番出嚟講,你都可以大條道理:「乜我係楊冪咩?我唔係吖嘛,點應呀?」面盲粉絲咬你食咩?
雖然趙麗穎後來都識得講,話自己當日嘅處理係「年少輕狂」,不過恨錯難返啦。有冇諗過點解咁多年嚟,一直有網民努力不懈、返工取酬咁款,係咁喪截圖、喪做對比,力證趙麗穎係楊冪嘅copy cat呀?你估依家係石器時代?食飽冇世藝?冇劇要煲、冇手遊要打、冇影音短片要拍?
如果年少輕狂,得罪嘅只係一個半個小粉絲咁都還好,至怕唔係咋!其實認錯呢味嘢,除非好似農夫嘅C君同陸永咁,唔九秒九劃清界線、以正視聽,好大機會恨錯難返、後果自負。否則?都係一笑置之啦。你睇衞蘭、衞詩;孖仔周志文、周志康,佢哋被人認錯得少咩?但你幾時見過佢哋發脾四?下次咁「好彩」,被人認錯,唱首「I DON'T BELIEVE IT」咪算囉,表態得嚟又不失家教。