【主播GOGOGO】李璧琦話你知！唱歌都可以抗疫

有睇開《繽FUN主播室》嘅觀眾，應該都對主播嘉琪嘅歌聲有啲印象，事關實在太...難以形容喇！而嘉琪亦自認係「音癡」，即係「音樂白癡」，連唱生日歌都會走音...所以今集《主播GOGOGO》，嘉琪就搵嚟藝人李璧琦（Becky）教佢唱歌，呢位星級歌唱導師除咗畢業於香港浸會大學音樂系、主修聲樂，仲有多年教學經驗，唔知遇到嘉琪呢個咁惡劣嘅學生，又搞唔搞得掂呢？

另外，雖然個個都唱歌，但唔係個個都知原來唱歌有抗疫功效！只要你係用正確嘅腹式呼吸同埋由腹部發聲唱歌，理論上唱一首歌就好似跑咗100米咁。而且有醫學專家測試過，唱歌嗰陣，大腦會生成同釋放類似嗎啡嘅腦內激素，可以促進同激發免疫球蛋白同埋增加抗壓力激素，從而提高身體嘅免疫力，所以只要唱吓歌仔，輕輕鬆鬆就可以抗疫喇！想知點樣唱歌先有抗疫功效？又想睇吓點先擺脫到五音不全？即刻睇今集《主播GOGOGO》跟 Becky學嘢啦！

場地：通利音樂藝術中心

李璧琦服裝：From Clothing Of　髮型：Leighton AVEDA