《艾蜜莉在巴黎》Hit爆！廚師男主角冧死港女

美劇《艾蜜莉在巴黎》（Emily In Paris）日前推出，即時大受歡迎，每集30分鐘左右，網友極速煲晒10集，仲大嗌唔夠喉！首先介紹番女主角，佢就係有「柯德莉夏萍接班人」之稱嘅美國女星莉莉哥連斯（Lily Collins），劇中佢造型多多，全身都係名牌，睇到網友睇到流口水！

《艾》呢個熱潮仲殺入香港演藝圈，藝人鄺潔楹都中咗招迷上呢套劇，日前佢喺社交網晒靚相，見佢頭戴漁夫帽，同莉莉劇中其中一個造型好相似，網友睇見都留言：「Judy in Hong Kong！」

有靚女靚衫睇，又點可以冇靚仔睇呢？喺《艾》飾演廚師Gabriel嘅男主角Lucas Bravo超級無敵靚仔，Lucas今年32歲，身高6呎1，有一雙電眼同迷人笑容，呢個Package真係冇得輸，吸咗唔少女粉絲！劇如人生，Lucas喺現實堅係做過廚師，幾年前喺法國餐廳做過二廚，但佢就好謙話自己廚藝麻麻，係整奄列見得人！試諗吓，有個咁靚仔嘅廚師煮嘢食畀你，真係咪話唔冧豬！