星夢一姐變大茄!菊梓喬慘變臨記閃現《C9特工》

20201016
東網電視
更多新聞短片
貴為一姐喎!
「星夢一姐」菊梓喬(Hana)近年揮低吳若希(Jinny)、連詩雅等勁敵,連奪兩屆「最受歡迎女歌星」,企穩一姐地位!但近日就有眼利網友發現,貴為「星夢一姐」的她,竟然在兩年前拍落的「倉底貨」《C9特工》中,「降呢」做「臨記」!
她在第15集中,扮演健身室顧客在認真做gym,而黎諾懿及朱敏瀚就在她身後行過,過場的她僅出現短短兩、三秒,連對白都沒有就已消失於鏡頭下,幸好導演畀面她,給她個大特寫!有網友串她堂堂「星夢一姐」竟然要做臨記,有些就讚她造型清秀,又有人估她其實是不是飾演重要角色,甚至終極boss!
其實近年星夢愈來愈多女歌手加盟,最新就有JW(王灝兒)及王敏奕,其中JW更來勢洶洶,一加盟就獲「點燈」拍劇做女主角,反觀Hana拍過3、4套劇,都只是戲份較輕的角色,今次更是做「臨記」,兩人地位可謂差天共地!而Hana沒有在社交平台分享曾在此劇演出過,但就被黎諾懿在社交平台晒片踢爆,他留言:「找亮點,能見到我偶像嗎?」對此Hana就大方回覆:「原來有靚仔喺我後邊。」一眾粉絲留言開心見到Hana,有些笑言原來自己沒有睇錯人。
對於被發現做「臨記」一事,Hana聞言笑爆嘴,解釋這個「美麗的誤會」:「嗰陣我真係做緊gym,點知有人叫我,原來係黎諾懿佢哋拍劇,佢哋租咗場嚟拍,佢叫我繼續做gym,我唔介意,佢哋影到咪影囉,只係咁啱take到我。(唔介意畀人誤會做臨記?)其實我都唔算係臨記,係路人咋,哈哈……(冇騷錢?)冇呀,我嗰時未知,因為係兩年前拍,如果早知叫佢哋畀個角色嚟。」
此算是她第一次拍劇,但外界將她與JW比較,對方一加盟公司就做女主角,她謙稱:「JW係師姐,我係後輩,希望過多幾年我都有機會做女主角啦,所以要努力啲,每個人都唔同嘅。(話你一姐都做臨記?)我從來都唔係,我呢啲做細,有得做已好開心。」她又希望大家可以留意她之後在《刑偵日記》的演出。
黎諾懿亦解釋:「嗰日佢唔係客串,係我哋拍嘢佢做gym,我誠邀佢可唔可以幫我出兩秒,佢話梗係冇問題啦,佢話唔介意,影咪影到,所以好多謝Hana,佢真係我偶像,我真係好鍾意聽佢唱歌。」
朱敏瀚亦回覆相同答案:「其實都幾好,不時有唔同artist做下彩蛋,提醒觀眾要留意套劇嘅每一秒。」而Hana「死敵」吳若希之前就在社交平台甫出扮死屍的相,自爆原來她在第一套劇《老表,你好hea!》中扮演一出場就被車撞死的角色。
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc