【生日前兩天失摯親】黎美言胞弟黎嘉駿墮樓亡

2020年10月17日 08:40
東網電視
更多新聞短片
R.I.P
一名28歲男子於本周五(16日)早上11時許,由灣仔駱克道墮樓,送院搶救後不治。據了解,死者為前女子組合HotCha成員黎美言(Winkie)的28歲胞弟黎嘉駿(Harry),他任職舞台劇界,演員、導演及填詞等多個範疇。黎嘉駿畢業於香港大學進修學院人力資源管理學系,生前是「想出軌劇場(OutStanding Theatre)」創辦人及藝術總監、香港作曲家及作詞家協會(CASH)會員,於舞台劇界發展多年,亦是自由身演員、導演及填詞人等,在新冠肺炎疫情陰霾下,藝術工作者的收入影響甚大。消息稱黎嘉駿生前備受事業及感情問題困擾。
「非常尊重你的決定」
前Hotcha成員、黎嘉駿的胞姐黎美言,她明日(10月18)便33歲生日,卻在生日前兩天驚悉胞弟墮斃,她傷心欲絕在社交平台撰文,並上載多張胞弟的照片悼念。她忍痛表示:「2020年10月16日永遠都是我最傷痛、最懷念的一天⋯⋯ 我只得一個細佬,一個我最親嘅親人,我由細照顧到大成長嘅細路,陪着我長大,成日關心我嘅細佬,昨晚你選擇離開了我們,你永遠在家姐心目中,是最優秀、最有有成就、心地最善良、非常有夢想的人 ,一個非常善良的男孩 我們的緣分只有20幾年,你多年為舞台劇嘅熱誠付出你創辦嘅#想出軌劇場,你填過這麼多份歌詞、身兼演員、導演、創辦人、藝術總監,你唔怕艱苦、唔問回報、甚麼也為人着想,家姐有你呢個細佬引以為榮.....今日我控制住自己嘅傷痛,經歷過未所經歷嘅事情,處理好家中一切事情回到屋企,我永遠好好紀念這個日期,還以為可以跟你到80歲,互相看着大家的家庭兒女..... 我知道已經係事實,你沒有做錯,我亦非常尊重你的決定 ....在家姐心目中永遠支持你的決定,沒有錯與對,真的。
我非常相信你曾經用心嘅創作,這10個年頭你感染過唔少人,你嘅堅持你身邊嘅圈子係一定會睇到,你這麼多朋友,他們會永遠想念你,包括我哋一家人,求天父把你安息,RIP 我們一定一定約定會在天國見面 ,我每天也為你祈禱。」
痛失至親的黎美言對於各方問候,首度「現身」表示:「好感激有好多歌手朋友、同埋舞台劇嘅朋友,細佬自己嘅朋友都好掛住細佬。有好多人掛住他,他係一個非常重情重意又善良嘅男人,有好多朋友,我以我細佬今生為榮,我最親嘅人,感謝大家為他送上最大嘅祝福,希望大家心裏面永遠有他,掛住他,黎嘉駿 Harry Lai 專業舞台劇演員、作詞人、導演 有機會睇番佢以前嘅演出作品。」
好友鍾舒漫表示得知消息後,不敢打擾黎美言:「我今天下午知道這事,我不認識她弟弟,但我心都好像塌下來了,因為我也有個妹妹,如果我妹突然離開我,我都不想繼續留在世界...本來約了winkie下個禮拜慶祝生日突然取消,很心疼她,因為她要處理弟弟身後事,一定很難接受。有位我們的共同朋友在take care着她,我不敢打擾她,都是與共同朋友聯繫着知道winkie情況,希望有甚麼能幫上忙的我都可以幫忙。」
而曾與黎嘉駿合作的馬浚偉表示,一起為《男人40 CEO》綵排,一直不知道他是黎美言弟弟,大讚對方「又乖又叻」,對對方離世感到無奈,期望他於天家快樂及不再有煩擾。受訪期間他明顯心情有點低落,得知對方死訊後於社交網與黎美言取得聯絡,向對方提起曾與死者唱live,可以提供網址給黎美言重溫。
DJ林柏希曾與黎嘉駿合作過劇集,並飾演兩父子,對於他的離世,深表哀悼,更於社交網以「阿仔」來形容對方:「我依然好記得佢每次見我都會叫Daddy,第一日開工嘅時候,佢仲主動同我講話自己係飾演我個仔,當時我仲話,咁大個?!之後,我好慶幸飾演過佢爸爸,因為佢係一個好乖、好有才華嘅人,佢嘅離開真係令我好心痛,希望佢可以安息!」
藝人張嘉紋對於隊友黎美言的胞弟墮樓身亡,她悲傷說:「都係傳媒朋友通告我先知,我都會私下send訊息畀Winkie,希望佢冇事,捱住,大家都捱住,辛苦啦。其實我同佢細佬喺2014年合作過做舞台劇,都係一個好積極嘅人,好努力嘅演員,佢弟弟離開咗,覺得好可惜。」
防止自殺求助熱線:
香港撒瑪利亞防止自殺會: 2389 2222
生命熱線: 2382 0000
明愛向晴軒: 18288
社會福利署: 2343 2255
撒瑪利亞會熱線(多種語言): 2896 0000
東華三院芷若園: 18281
醫管局精神健康專線: 2466 7350
利民會: 3512 2626
賽馬會青少年情緒健康網上支援平台「Open噏」: http://www.openup.hk