【回到未紅時】周柏豪原來幫過容祖兒斟茶遞水

2020年10月17日 15:56
東網電視
更多新聞短片
周柏豪原來當年都幫過容祖兒斟茶遞水。
藝人周柏豪早前接受電台主持車淑梅訪問,他入行13年,於娛樂圈經歷高山低谷。他擁有七級鋼琴造詣,當年加入音樂創作人陳光榮的錄音室,當義務工程師,斟茶遞水、洗廁所一腳踢,他說:「第一個星期我遇上容祖兒嚟錄音,我幫佢斟水、抹咪、搬櫈,佢當然唔識我,我亦都冇自信,唔敢望佢,到依家我都唔敢話畀佢聽……我最開心見到鄭伊健,佢係我超級偶像,我會偷望佢,偷聽佢唱歌。」他表示當時最叻是叫外賣:「我係『叫外賣專家』,七、八個人,每日三餐,我全部叫啱,原來聽人講嘢,係要用個心去聽,先至唔會錯!」
他於18歲那年突然滿面爆瘡,當然他遇上了現今的太太朱小姐,並展開追求,他為保護女友可以去到好盡:「我哋冇資格豪食、豪飲、豪住,初期好多時都係由佢埋單,佢從來唔介意,所以如果歌迷唔接受我結婚,我唔會在乎冇咗份工,因為我好愛呢個女人!十年來我冇公開拖過佢隻手,我哋淨係買外賣返屋企食,好安全……最驚嗰次都係2016年帶住隻求婚戒指,去富士山向佢求婚,我偷咗佢隻戒指去度Size,最驚過關嘅時候畀人查出,如果申報又怕畀佢發現,於是我話不如我哋兩個分開過關。海關問我隻戒指係乜嘢,我話用嚟求婚,佢講咗啲嘢,我唔知道係乜,佢冇沒收,可能係祝福我!情人節嗰日求婚成功之後,天上竟然出現一道彩虹,我知道係上天對我嘅祝福。」
他覺得如果人生可以返轉頭,他希望填補一個遺憾:「就係因為我哋怕結婚消息通天,我冇喺佢試婚紗嘅時候陪住佢,為佢拉拉鏈,冇聽佢問我『我靚唔靚?』及冇答佢『你係最靚』等環節……不過我哋已經結婚四年喇,出年第五年,我會做一件事,就係抱住囡囡陪太太再穿婚紗,同佢拉拉鏈,補番同佢講嗰句佢係最靚嘅!」
在疫情下,工作暫停,反而令他與初生女兒相處時間更多,是千載難逢的緣分,他笑言「重金禮聘」四個月大的囡囡在新作品《劫後餘生》MV中亮相:「哈!囡囡嘅報酬係兩粒餅仔,出現一兩個鏡頭無傷大雅,呢個亦係我同佢嘅一個記錄。MV係喺我屋企拍攝,全屋都係人,佢好興奮冇瞓晏覺!依家我唔會應酬,完成外面嘅工作第一時間會返屋企湊女,我想再多生兩個,先嚟一個仔,湊夠一個好字!當然我都會繼續努力工作,我嘅目標係將每一個範疇都做到最好,如果大家認為天王係(娛樂圈)最高級別,我希望自己能夠達到呢個級別!」
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc