【土地問題】葉文輝「鐵面陳」愛環保諗定綠色殯葬

又係香港土地問題！政府提供的龕位長期不足，私營龕場申牌年底屆死線，有數十萬龕位迫遷，香港人生前愁冇屋可住，死後憂無處容身，到底應該何去何從呢？

「鐵面陳」王致狄：「其實我冇好詳細考慮過點樣處理身後事，但如果畀我揀就會選擇喺海上，因為始終海上撒灰比較環保，而且依家好推行綠色殯葬，海上撒灰屬於其中一種，我都好支持呢個概念。」

陳俞希（Hailey C.）：「我應該會簽器官捐贈，捐我嘅器官畀啲有需要嘅人，係我一直都想做嘅事情。以前我有諗過自己好驚火，但又驚土葬畀蟲咬，最後我選擇火葬，然後將骨灰撒落海，因為我好鍾意海洋。」

DJ葉文輝：「希望我嘅後人幫我嘅遺體火化後，再將骨灰撒落公海度，呢個做法係最好，一嚟唔使啲後人有太大負擔，二嚟我覺得人生前比死後緊要啲，如果離開咗人世就唔使太多牽掛，要掛就喺心裏面，或者攞番啲相出嚟望都得㗎啦。至於撒灰嘅最理想海域，梗係香港水域啦，我喺香港長大，呢度係我最愛嘅地方。」

藝人Kawaii：「之前有經歷過幫屋企人撲龕位，政府要排3至5年隊，有啲又話要搵私人買位，都話要20至40萬不等，我都有反思過點處理自己身後事，我同屋企人都係天主教徒，我走後係可以安葬喺天主教墳場，不過細個時好怕要燒自己，曾經諗要土葬，後來發覺又要喺10幾年後起番副骨再火化放龕位，咁何解唔乾手淨腳，一早燒咗去，將啲骨灰做條鍊留為紀念，其他骨灰就撒落花園，用嚟灌溉萬物呢...呢個會係我嘅選擇！」

----------------------------------------

「繽FUN星網」誠招各類有趣短片！

家有可愛貓狗，想同更多嘅人分享？

有橋有料，素人想一片成名？

立即寄片嚟： bunfun@on.cc