東方日報C1:蕭正楠跟米芝蓮大廚學藝 做港版木村!

2020年10月19日 03:03
東網電視
更多新聞短片
識煮幾味的人夫蕭正楠將獲打造為「港版木村」,跟米芝蓮大廚學藝!他將於myTV SUPER的新節目炮製Fine Dining(高級餐飲),有口福的老婆黃翠如自言最着數,老死曹永廉則警告他要學得好好睇睇,免得失禮!
新冠肺炎肆虐全球,近大半年航空業停擺,無綫旅遊節目全數「冚旗」,節目選材本着「窮則變、變則通」的理念,有見人人留家抗疫下廚開餐,煮食節目應運而生。無綫落力打造一班星級廚神,如肥媽、李家鼎、黎諾懿、陳煒及江美儀等,他們的節目在「疫境」中大受歡迎,不少更乘勢擴展飲食生意,財源滾滾來!
抄筆記明益老婆
有見及此,myTV SUPER以日本男神木村拓哉主演劇集《摘星廚神》為藍本,推出自家製高檔飲食節目《Testing Menu》,由蕭正楠一連十集主持。今次阿蕭有木村「加持」,還有機會跟多位米芝蓮廚師學藝,升呢做「Fine Dining廚神」指日可待!
阿蕭要從一個新手開始跟米芝蓮廚師學廚,當中難免有壓力,不過屢嘗挫敗正好是他把「烹調小宇宙」推向更高層次的原動力,他昨日受訪時大呼興奮:「遲啲會跟米芝蓮學嘢,用最平嘅食材煮Fine Dining,真係好想學呀!咁難得佢哋將秘技教我,我會抄低筆記,將呢10集學到嘅再煮畀大家食,睇吓同之前有咩唔同,希望真係做到『摘星廚神』!」阿蕭的老婆黃翠如最有口福,她不禁笑說:「通常係佢負責煮,所以如果佢學到,我會好着數!」
該節目昨日拍攝宣傳片,愛下廚的阿蕭表示:「沒有不好的食材,只有劣質的廚師;食材本質不分貴賤,廚藝決定價值。」為了證明此言非虛,他在片中挑戰以最少的食材,炮製最極致的味道,他為精緻的菜餚命名後,將邀請星級嘉賓試食。
曹永廉潑冷水
曹永廉與阿蕭向來老友,廚藝亦相當耍家,問到可有獲邀試菜?他即抵死說:「老老實實,我就未食過佢煮嘅嘢,可能我當運、好彩啦!話佢煮得好叻喎,佢老婆咁瘦,佢自己又唔肥,好食極有限啦!(佢扮木村煮Fine Dining!)今次佢做呢個節目,仲要扮木村,我覺得有少少侮辱囉……希望佢做得好啲啦!人哋木村煮嘢真係做得好細緻㗎,平時見佢(阿蕭)都係煎吓雞翼,未必出到大場面!不過咁……可能最近佢學咗啲好嘢,但我煮嘢一定叻過佢,如果搵我上去節目令佢冇面,呢個我就最擔心!」
更多新聞,請瀏覽東方日報網頁: