山火襲元朗 張明偉袁文傑狗場救毛孩

20201026
東網電視
更多新聞短片
大家都係無私嘅愛犬英雄!
尋日八鄉大江埔對上山頭發生山火,逼近附近狗場,過百隻貓狗生命受威脅,負責人緊急疏散撤離並在網上作出緊急呼籲支援,當中處境劇《愛.回家之開心速遞》飾演「George」嘅張明偉、袁文傑、楊證樺就義不容辭凌晨獻身拯救動物,絕對係義氣仔女!
張明偉於社交網發文,指尋晚臨瞓前喺網上見到要人手,佢換件衫就出發,去到現場佢自己有咩就派咩,好似幫手用毛巾冚住啲籠等狗仔唔會驚,又同其他義工齊齊熱心救小生命出生天,徹夜未眠咁進行救援,最後仲呼籲大家以後拜山記得整熄火種先好離開。
而袁文傑及楊證樺亦有現身,二人更被在場義工認出,不過兩人都表現低調。網友就大讚眾藝人咁有心有力做救援,大讚佢哋為咗小動物都咁有心,一定係有情有義呀!
袁文傑接受東網訪問就講述當時救狗經過:「我凌晨2點幾到達,等候義工安排入場,去到時有部分貓已救走,等待狗狗安排入籠再搬走,狗見到人頭湧湧都有啲驚,我負責將狗狗抬去山坡斜路下面,當時入黑同埋路面都比較濕,同埋係斜路,狗狗Size都唔係細,全部都係大狗,所以要好小心,義工朋友再安排送去安全地方,呢個場係我近期有接觸,開始去做多啲身體力行嘅行動,同負責人認識,因緣際會去過探2次,最初發生事好擔心,咁就即刻入去,我逗留到清晨先走。」
楊證樺指昨晚收到朋友叫幫手,就二話不說過去,去到現場見到好多義工幫手,但初時都有少少混亂:「因為大家都好擔心啲貓貓狗狗,啲火雖然唔算好近,但因為咁啱啲風吹過嚟,令大家都有危機感,商量咗一段間時間,就決定將啲狗放入狗籠然後抬走,成個過程我哋都係幫手,人哋講,我哋做。而去到現場見到袁文傑,我由凌晨二點逗留到朝早六點,走嘅時候見到張明偉,佢就繼續留喺度幫手。」楊證樺指自己因為做緊寵物生意,之前亦曾到訪過狗場,得知有啲狗場連醫藥費都畀唔起,所以幫手搞活動籌款。今次呢件事,令佢感到心痛,最想呼籲大家掃墓唔好留低火種,以及希望社會大眾能夠多啲關注流浪毛孩。
P8]
狗場義工陳小姐非常感激袁文傑等幫忙,並讚3位演員全無架子,與200多位義工分工合作,三位藝人負責搬籠工作。陳小姐更祝福袁文傑等事業更上一層樓,佢又話狗場依家冇事,狗隻大遷徙後,朝早9點幾火舌熄咗就返回狗場。
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc