59歲曾偉權病逝　舊愛梅小惠嘆惋惜：感恩遇上過他

59歲藝人曾偉權於今年初被指患上肺癌，11月22日就60歲的他今日傳出死訊，他出道後便與文雪兒合作，文雪兒於社交網證實他離世消息，寫道：「你出道的第一套劇集，我便和你合作，上次我們重遇的時候，不是說好要再度合作的嗎？願您在天家一切安好！」並附上合十emoji及昔日二人的劇照，契妹Sasa晚上在社交平台交代曾偉權離世消息，她指曾偉權於本月12日早上離世，並表示不會設靈，因為他生前怕嘈，希望大家可讓他安靜地入土為安，SaSa並多謝各方好友伸出援手。

文雪兒接受東網訪問時亦表現傷感，強忍淚水，她說：「係麗的嘅舊同事話佢尋晚離世，所以我喺社交網懷念吓佢，好唔開心，我哋中間有段時間冇見，後來喺無綫撞番有交換聯絡，之後一路有留意佢喺朋友圈Post出嚟嘅嘢，好欣賞佢，佢心地非常好，放工會喺街度睇貓狗，佢哋畀車車死會幫佢哋執屍，咁好嘅人點解咁後生走咗，所以今日都好唔開心。」

曾與曾偉權拍拖13年的梅小惠，受訪表示：「覺得惋惜?偉權喺我人生中確實佔咗重要嘅一頁，呢個係無可否認嘅，我亦都好感恩喺我人生中曾經遇上過他，佢係一個好有愛心嘅人，同埋一個好專業嘅演員，希望佢嘅家人同朋友都好好釋懷及保重?」至於會否幫手處理身後事？她說：「分開咗咁多年，我諗都冇乜需要我幫手，但如果要我幫手，我都唔會拒絕！」小惠胞姐梅小青亦說：「十分十分惋惜，他溫文爾雅，很有禮貌，很有愛心，他的演技很好，演員道德也很好，每次與他合作，他都會盡心盡力演出，其中《深宮計》中的駙馬我真的讚賞不已！我和我的家人都感到無限惋惜！祝願他在天上健康快樂！」

無綫高層樂易玲回應：「都陸續有好多演員朋友通知我消息，我都會聯絡佢家人同契妹，睇吓有乜嘢需要幫手，願他一路好走，可以上天家。」無綫藝員科得悉曾偉權離世消息後深表惋惜，現正聯絡其親屬。與曾偉權合作過無綫劇《牛下女高音》的吳岱融、歐瑞偉對於曾偉權的離世深感惋惜，吳岱融感慨地表示：「真係人生無常，第一次同佢合作就係最後一次合作，同佢合作恍如昨日，R.I.P.。」而劇集女主角黃心穎也在社交網上載照片懷念對方。

曾偉權畢業於麗的電視最後一期演員訓練班，首部客串演出劇集《愛情跑道》後便拍下不少作品。直到1983年憑《101拘捕令》中飾演警察「李長仔」一角而深受市民愛戴，成功入屋，更奪得亞視台慶夜的「最佳新人獎」。1990年，他轉投為無綫效力，但卻多被安排演出閒角，未見有破性發展。直到2012年他再轉投香港電視網絡發展，2015年11月又返回無綫。近年劇集有《牛下女高音》、《法證先鋒IV》和《使徒行者3》。

感情生活方面，他曾與麗的藝員訓練班同學楊雅潔拍拖3年，但1984年份手收場。1986年因與梅小惠合作梅小青監製的賀歲喜劇《滿堂紅》時而認識，結果一拍即合拍拖，多年來人前人後表現恩愛，惟拍拖13年竟然分手收場，令外界人大跌眼鏡。事件有傳與馬來西亞藝人葉麗儀有關，事件即引起熱話，而他的星途亦大受影響。多年後他受訪時表示對舊愛梅小惠有歉意，蹉跎了她的歲月。

網上流傳遺言

另外，網上流傳一條「曾偉權最後獨家遺言」的片段。片中見他臉龐消瘦、臉色蒼白，說話時聲音沙啞，但精神尚算不錯。他以有份主演的劇集《牛下女高音》中的角色「黑仔」為喻，指一個人若果患病，最重要是積極面對，如果盡了力便無憾，令人傷感。

片中曾偉權表示：「大家好，我係曾偉權，喺《牛下女高音》入面嘅『黑仔』，『黑仔』本身性格因為成日都好黑，命運好慘。對我自己嚟講都有啟發。人生喺世界上面都有好多阻滯，有時係健康問題，有時係工作問題都會發生，自己控制唔到。成日都講，如果自己可以控制到、可以改變嘅，就盡量去改變。如果唔可以改變嘅，自己就要接受。接受同時，睇吓自己用咩方法去處理。可以改變到自己心態去接受係最好嘅，唯一可以改變嘅係我哋自己性格，唯一係健康我哋控制唔到。但係我哋自己點諗可以改變。好似啲人有啲病出現，出現咗自己無得控制，只可以接受。我方法係積極面對，盡自己嘅能力，做得幾得幾多。好多嘢我哋無辦法。好似我養寵物，年紀大咗佢走，我哋都會傷心，但問題係傷心之餘，有無遺憾先？如果無遺憾係ok。你係可以對住佢笑，完全面對，你已經盡咗力做咗一切。覺得只要盡咗力就無問題。所以呢個係我自己嘅睇法，希望幫到大家。」