本日日本:倉敷帆布製造 多啦A夢四次元百寶袋背囊登場
20201119
東網電視
更多新聞短片

採用日本倉敷最高品質一級帆布「倉敷帆布」來製造嘅多啦A夢四次元百寶袋背囊,值得粉絲望多兩眼!(互聯網)
適逢今年係《多啦A夢》連載50周年,相關紀念產品真係多到數唔晒,想買既實用又有型嘅出品,啱啱由IMPERIAL ENTERPRISES株式會社推出嘅多啦A夢四次元百寶袋背囊值得大家望多兩眼!呢款背囊嘅一大賣點係採用日本倉敷最高品質一級帆布「倉敷帆布」製造,布料質感柔軟同時又非常耐用。設計方面,以藍白色為主調,當中加添咗唔少心思細位,例如有印上多啦A夢樣貌嘅牛皮標籤、底部有紅色嘅尾巴,另外背囊前方設有一個以四次元百寶袋為概念嘅小袋,可拆除作單獨使用,而且拉鏈拉手更有鈴鐺圖案,十分精緻。
背囊內部同樣有睇頭,內裏印上多種秘密法寶圖案,並設有適合用來放置小物嘅拉鏈網袋及放平板電腦嘅尼龍扣暗袋。值得一提係,隨背囊會附送有多啦A夢刺繡嘅鎖匙扣,同樣可分拆獨立使用。背囊售價為24,800日圓(約HK$1,835),現於PREMICO網店有售。