《鬼滅之刃》掀Cosplay潮 藝人最鍾意扮咩角色?

2020年11月22日 21:15
東網電視
更多新聞短片
相信萬聖節見唔少!
日本人氣動漫《鬼滅之刃》近日於各地掀起熱潮,更帶動多位藝人爭相Cosplay當中角色,令娛圈刮起一陣Cosplay風!其實有唔少藝人都曾試過大玩Cosplay,個個都入型入格、各有特色!
陳婉婷:「最深刻係有次我扮《聖鬥士星矢》入面嘅北冕座『塞爾尼婭』,嗰次我覺得真係好靚,之前試過着古裝、和服、女僕,甚至扮過『多啦美』,但真正認真咁Cosplay嘅話,就嗰次先係第1次。如果再有機會,我就想扮依家最Hit嘅《鬼滅之刃》,我最鍾意入面嘅『禰豆子』,因為我本身鍾意和服,而且佢好可愛,自己都好想試吓。」
組合天堂鳥成員Gordon:「最近生日我啲朋友同我搞咗個Party,當日我作為生日會嘅主人翁,梗係要打扮得非常之精彩啦,呢個印第安人Look,下身裏面真係得1條內褲,嗰個天氣凍,所以去咗燒嘢食,咁我哋比賽邊個打扮最差就要畀人畫面,咁我係生日嗰個,就算贏定輸都照畀人畫。仲有1次,我參加動漫節扮殭屍,嗰次同魯芬姨一齊合作,好遺憾亦都係最後1次合作。」
譚杏藍:「其實我以前真係Cosplayer,玩過3、4年,每1年嘅動漫節都有好多唔同嘅Event,而每日都扮演唔同角色,其中1年動漫節,去到第4日,但我真係車唔切套衫,因為所有衫都係我哋自己車,仲要夾咗其他人一齊着,記得嗰日晨早就拎咗塊布,即場喺會展剪,然後成件衫都係用雙面膠紙黐,可能以前啲雙面膠紙特別黐啲,完全冇甩過,大家都以為我係車出嚟!」
黃靜藍:「最深刻印象1次Cosplay經驗係工作需要,扮《Frozen》入面嘅主角Elsa,不過因為我啲頭髮太多,戴唔到個金色假髮,最後用番我本身黑色頭髮上陣,做咗1次黑色頭髮嘅Elsa。至於我最想Cosplay嘅人物,因為我自小就好鍾意睇卡通《美少女戰士》,所以有機會想試吓。」
劉晨芝:「平時Cosplay扮嘢通常因為萬聖節同埋喺美國,成日會扮埃及妖后、Tinker Bell同埋紅心王后嗰啲,最深刻一次,係扮得最耐嘅係埃及妖后,因為淨係化個妝都化咗2至3個鐘。我想扮一個Saber角色,係日本動漫人物,當然最多人扮一定係Sailor Moon美少女戰士同春麗,都想扮吓,但好多人扮。」
楊玉梅:「最近客串《愛.回家之開心快速遞》扮演美人魚角色,呢個Cosplay件衫胸前兩個殼,遮住重要部位,其實有啲尷尬,但我都有演員道德,點都着出嚟畀導演睇,佢哋都覺唔得,都換過另一件,多謝公司睇得起我,做過中年美人魚!後來換咗新一套Cosplay,出嚟個效果好正、好靚,其實自選美後都冇着過咁性感,自己都面紅又好笑,但係好好玩,起碼自己都着得起,自信心返晒嚟!我都未試呢啲Cosplay㗎,好難忘!」
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc