與江嘉敏台慶互睥 馮盈盈暗寸係雙面人?

20201124
東網電視
更多新聞短片
馮盈盈大講雙面人!
話題港姐馮盈盈(FYY)又有新搞作,喺節目《#後生仔傾吓偈》大講「雙面人」,網友自己「對號入座」,矛頭直指FYY死對頭江嘉敏!
仲記得台慶當晚影大合照嗰陣,唔知係咪有心人大整蠱,FYY同江嘉敏被安排企埋同一行,兩女斜視互睥,盡顯霸氣,中間夾住嗰個胡鴻鈞直係尷尬到死,惟有耷低頭避免受牽連,話晒台慶係普天同慶嘅好日子,點都唔好搞大件事!
咁啱《#後生仔傾吓偈》今一集以「雙面人」做主題,FYY開口就話:「雙面人問我最清楚,對住你一個樣,對其他人又另一個樣。事事都批評嘅人,一定係自己有嗰種特質,例如話人貪錢。」
陸浩明醒目食住上:「即係話你黐富二代嘅人,自己一定係想黐富二代?」馮盈盈回答:「本身有咁嘅特質,先會特別提起。由得佢哋繼續講,反正我冇做呢樣嘢。(可能調轉係啲富二代鍾意黐埋冠軍靚女度接近你?)如果佢有咁嘅言行舉止一定有人知,自然有一日佢會為自己做過嘅事帶嚟後果。唔需要你同佢操心,好似同佢同一層次咁,喺度爭論誰是誰非。」
江嘉敏接受東網訪問,佢話:「唔係YY(盈盈)講嘅,我就唔回應喇!」對於盈盈指事事都批評嘅人,嗰個人自己都有嗰種特質,江嘉敏就話:「我同意佢丫,呢句講得好啱!」
早前,有傳馮盈盈上賭王四太梁安琪兒子何猷亨豪華遊艇出海開P,事後就與江嘉敏反目。
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc