張曦雯被冒認呃粉絲　李日朗驚現同性戀交友網

有購物網站擅用台灣女星柯佳嬿劇照推銷飾物，當事人肖像權受到侵害，最終網站被判賠償50萬新台幣。過往亦曾有不少藝人被他人擅用或盜用相片，有些更要訴諸法律去解決。張曦雯：「試過喺社交網有人用我嘅相嚟冒認我，同我哋粉絲講話需要幫助，好彩啲粉絲都有懷疑冇中招，呢啲情況都試過幾次。」

李日朗：「梗係有啦，我試過畀人盜用啲相，仲唔止一次，有一次我朋友半夜send咗張相畀我，話喺網頁上見到我啲相，初時我都覺得好平常，但個網頁係同性戀交友網站，而且我仲曾經喺幾年前上過佢哋嘅熱門榜，如果大家仲喺同性戀交友網站見到我啲相，嗰個一定唔係我嚟嘅，大家千祈唔好畀人呃。」

王致狄：「之前有啲馬來西亞嘅粉絲，話有另一個社交網帳戶盜用咗我啲相，約佢哋私下出嚟見面，仲叫佢哋買點數卡呃錢，好彩啲Fans問起我先知有咁嘅事，而且唔止一次，甚至有騙徒仲會將我張相，Key落護照度嚟扮係我本人。我知道之後都叫佢哋立即舉報，以免再有其他受害者。」