打邊爐最緊要啲咩？菊梓喬點解話係愛斯基摩人

冬天大家都鍾意打邊爐，暖笠笠夠晒滋味，如果可以忽發奇想，藝人又會最想喺咩地方、環境下打邊爐？浸住溫泉打邊爐，定喺3萬尺高空打邊爐，抑或喺無人小島打邊爐？

菊梓喬：「一定係去北極，北極嗰啲愛斯基摩人好鍾意砌嗰啲冰屋，如果最正就喺嗰啲冰屋裏面打邊爐，一邊打邊爐又可以捐個頭出去睇北極光，仲唔係最正？希望將來可以成班朋友一齊去，諗到呢個畫面都好開心。」

麥皓兒：「冬天最適合就係打邊爐，我自己就希望1次過滿足3個願望，同時有齊視覺、味覺、嗅覺嘅享受，除咗要有新鮮食材，環境都好重要，我好希望喺高空上面，邊望住大阪府嘅夜景，邊歎住暖笠笠嘅火鍋，最好就浸埋溫泉，例如食住牛奶鍋咁浸牛奶浴，浸番同一種味道嘅溫泉，別有另一番風味。」

羅浩銘：「曾經試過喺加拿大讀書嘅時候，同一班朋友上雪山滑雪，租一間度假屋3日2夜嘅，我特登帶咗好多嘢食去打邊爐，仲要行去露台度打，非常之凍，冇意思嘅，但後生乜都玩一餐，呢件事都幾難忘。」