14歲就鍾意森美！湯怡整蛋糕為博偶像一笑

藝人湯怡最近經常邀請圈中好友到其影片頻道作客，一齊整蛋糕，呢日佢搵嚟兒時偶像森美，二人仲大聊往事。片中湯怡不斷強調自己由14、15歲開始迷上森美，又準時收聽對方嘅電台節目，對於有如此高質嘅粉絲，森美直言：「我嘅演藝生涯冇白費，我成日叫我老婆對我好啲，靚女都係我粉絲。」

湯怡回想年輕時有次去活動為見森美一面，而其清純美貌竟成功吸引森美嘅目光，更被森美捉上台。當日佢仲專誠整咗個芝士蛋糕到後台送畀對方，事隔多年，二人決定再次整同款芝士蛋糕，甚有意義。過程中森美學得有板有眼，但卻「臨尾香」因貪玩拋起蛋糕，最終成品慘不忍睹，令全場爆笑。到影片尾聲，小粉絲湯怡知道偶像即將生日，於是送上生日蛋糕，令森美又驚又喜。