陳凱琳拍檔吸金力超強！疫市豪花10萬送智能電話予員工

前港姐陳凱琳自家護膚品牌拍檔KOL雪姨向來人氣高企，post親嘅片閒閒哋幾十萬點擊，拍出好片除咗靠口才之外，幕後員工當然係最大功勞者，加上疫市下大膽擴充業務，佢深明員工工作辛苦，當然要獎勵吓員工，趁住聖誕將至，豪花10萬蚊買iPhone送畀員工！

向來性格幽默嘅佢，點會錯過整蠱員工嘅機會，佢先要求員工飲晒客戶嘅產品，然後將手機放入紙箱度，當佢哋發現裏面係iPhone時，驚喜到叫咗出嚟！

其中一名員工Echo較早前曾透露想購買iPhone SE，雪姨特意送咗呢個較低階嘅型號畀佢，當佢意識到自己得1部iPhone SE時，忍唔住流眼淚話：「因為冇錢先揀SE咋！」相當搞笑。唔好以為雪姨孤寒，最後再送咗部iPhone 12 Pro畀佢，更宣布將會出花紅，寵員工嘅程度連網民都忍唔到讚：「絕世好老闆！」、「仲請唔請？我想求職！」

雪姨向來出手闊綽，早前一炮過以950萬購入傳奇才女林燕妮位於寶馬山故居送畀媽媽自住，對家人對員工都非常之好。