戴祖儀突然「被求婚」　關唔關羅天宇事？

藝人戴祖儀近年人氣急升，憑一雙長腳兼甜美外貌被封新一代女神，而其感情生活一直備受關注，佢曾與羅天宇傳緋聞，但兩人未有正面承認，令戀情更疑幻似真。今日戴祖儀喺社交網晒出「被求婚」相片，相中可見有個神秘男子向佢下跪，更為佢套上戒指，而佢手持1束鮮花，更笑到見牙唔見眼，流露幸福笑容！佢仲表示：「是有點突然，等心情平伏（復）再詳細給大家說。」相片一出，大批網民更紛紛直呼心碎一地，亦有人猜測神秘男子係咪羅天宇！

但冇幾耐就有網民踢爆佢其實係為新歌《逆流直上》宣傳，而該名神秘男子原來係MV男主角謝東閔，網民發現只係MV情節後即表示鬆一口氣！

戴祖儀嘅求婚post引起好多粉絲、網友關注，對大家以為佢公開喜訊，回覆東網笑言：「聽日同謝東閔出新歌，係MV情節，（仲以為宣布戀情？）我貪玩，我都開始有少少後悔。」續指新歌係新劇《香港愛情故事》插曲《逆流直上》，今年佢推出2首歌，2首歌都係同謝東閔合唱：「我絕對配合公司嘅安排，對於今年終於有第2首歌，感到十分之高興、感恩。」