廖慧儀前度輕生後首現身!孔德賢劃清界線唔認約行山

20201216
東網電視
更多新聞短片
孔德賢終於蒲頭,面對傳媒有備而來。
藝人孔德賢捲入廖慧儀與離世前男友Sam的感情糾紛,Sam自殺後,孔的社交平台被「轟炸」,事後兩位當事人遭暫停工作,直到今日台慶頒獎禮宣布入圍名單,孔德賢終現身面對傳媒,對答如流,有備而來。
談到事後被飛出《2020勁歌金曲優秀選第二回》主持工作,他表示:「本來係安排做主持,但因為我要拍《把關者們》,所以作出咗調動啫。」他直言面對海量網民留言,自己心情受到影響:「唔開心,屋企人同朋友都好擔心我,休息咗幾日先再投入工作。(公司有照肺?)係發生咗新聞,了解吓啫,何哲圖同余詠珊都有打畀我,話晒我係新人,佢哋有教導我點樣面對問題。」
談到與廖慧儀的關係,他一再強調只是朋友與同事。當被問到相約行山,他急忙澄清: 「嗰日我去咗行龍脊,人多到好似行花市咁,不過我係約《#後生仔》Anson,全程冇見過廖慧儀,亦唔知佢有冇去。(日後劃清界線?)咁又唔需要,大家係同事,喺公司見到面咪打招呼囉。(覺得自己好無辜?)咁我諗全香港冇人想啲件事發生,都係唔好講咁多,免得佢(死者)屋企人睇到唔開心,相信廖慧儀身邊人都會擔心。」談到日後星途,孔德賢表示會盡量做好自己,用表現改變觀眾睇法。