湯洛雯出口術拉票： 梗係想馬國明贏！

今年視帝之爭暫時以王浩信領先群雄，氣勢力壓爭取冧莊的馬國明與「天堂哥」袁偉豪，搞到兩位「阿嫂」要幫口拉定票！馬國明女友湯洛雯錫住另一半，她笑說：「私心梗係想馬國明贏啦，但佢對獎項都冇所謂，我哋兩個都好隨緣。」自爆反而另有着緊的人：「最想見到高海寧攞視后，呢兩年佢接咗好多唔同類型角色都處理得好好，又不斷增值自己，好值得攞獎。」認真姊妹情深。

至於「袁太」張寶兒受訪時力撐另一半：「作為太太就梗係支持丈夫啦！不過王浩信喺《踩過界II》做盲俠，飾演冇咗視力嘅角色都可以做到咁有魅力，係好值得欣賞。」又指會在背後默默支持：「到時會幫佢襯吓衫，煮定飯等佢返嚟消夜！」