【戀愛必修科】錯綜複雜 圈中有咩多角戀你唔知?

20201219
東網電視
更多新聞短片
睇呢篇文之前,真係要做好心理準備…
前港姐冠軍陳曉華因暗撻組合MIRROR成員陳卓賢(Ian),忽然牽連前男友狄以達及Ian新劇拍檔余潔滢,二人行變4角戀,真係睇到人頭都大埋!不過其實圈中個個靚仔靚女,有時真係好難控制戀愛心,一個唔覺意撻着人哋前度呀…
憑無綫處境劇《愛.回家之開心速遞》飾演「博士」而入屋嘅馬貫東,被發現佢位26歲圈外女友Christy嘅前男友係朱敏瀚,兩人2014年相戀,而朱敏瀚前年就同華姐冠軍余思霆撻着,男方及後向Christy提出分手。
講到余思霆,佢同朱敏瀚一齊之前,就同組合天堂鳥成員歐喬鋒(Tyrese)拍拖3年,之後有傳因林欣彤介入而分手。
圈中筍盤馬國明今年就認愛33歲湯洛雯,個個睇好佢兩個會拉埋天窗,不過眾所周知湯洛雯就同馬國明前女友黃心穎係好姐妹,惟依家2人已互相Unfollow。
至於湯洛雯嘅前男友羅天宇,就同蔣家旻傳緋聞傳到似層層,成日被發現兩個一齊出街,蔣家旻又同湯洛雯係Best Friend,本月初先一齊為好友岑杏賢做陪嫁姊妹。
不過依家蔣家旻就被指同舞蹈老師麥秋成秘密撻着,兩個人成日唔避嫌公開合照,咁啱麥秋成亦同過蔡思貝拍拖,佢哋啲恩怨情仇都真係一匹布咁長…