李佳芯慘被舊愛背叛 譚凱琪被大話男呃變小三

2020年12月21日 17:30
東網電視
更多新聞短片
伍詠薇與林盛斌等人大談自己感情經歷。
藝人李佳芯(Ali)、何廣沛、陳瀅、譚凱琪(Zoe)為宣傳新劇《愛美麗狂想曲》,接受邵氏節目《Tiger's Talk》訪問,席間以感情第三者作為話題,主持人伍詠薇與林盛斌即場爆料,指有消息指黃宗澤(Bosco)與楊詩敏(蝦頭)交往甚密,對此後者連忙解釋:「大家同事朋友一齊玩,我知Bosco好鍾意我呢種類型,成日有意無意提起我,佢鍾意食蝦頭,識食一定係食蝦頭。」
沒料陳瀅即致電Bosco,電話中的他笑說:「我直頭迷戀佢10年啦,佢起勢用電眼電我,最慘係電我嗰時永世唔着低胸。佢出晒名身材好,但次次喺廠出面見佢都着得好密實,真係谷鬼氣!如果佢可以着住三點式喺我屋企客廳,我真係會忍唔住同佢講I LOVE YOU!」不過蝦頭即笑指他沒有福氣,皆因過往的性感打扮場口均與林盛斌合作。
談到「小三」話題,Ali自己入行經常被安排演小三,但私下沒有經歷過,反而試過男友一腳踏兩腳:「我對感情好冇安全感,細個同個男仔拍拖,一齊冇耐佢就去外國讀書,一走就走4、5年,我就冇同其他人拍拖,佢亦聲稱自己冇拍拖,返嚟之後我哋一齊番,不過憑女仔直覺,我就有啲懷疑。」
後來她透過社交網發現有位女子拍下消防員男友的匙扣,並留言答謝男友陪伴,故立即主動分手:「因為我太冇安全感,點解要呃我咁耐?(如果佢求復合?)細個唔識,以前係有少少大話都唔得要分開,覺得個愛情已經有污點,反而依家年紀唔同,心態唔同,會諗佢係咪真係有咩原因,或者自己係咪冇時間陪佢。」
而譚凱琪則自爆曾在不知情下做了第三者,指當時男友揚言已與前女友分手,沒料拍拖一段時間後,於別人口中得知自己才是「第三者」:「個男仔講大話太勁,我會信晒,受傷係冇諗過男仔啲大話可以咁犀利,真係晴天霹靂,後來即刻分手,到依家都已經冇聯絡。」
至於伍詠薇就提到第一段婚姻:「外界以為我戀父,其實我唔係,當年我21歲,雖然佢大我31年,但外表頂多似40幾歲,佢有才華同有錢,好有男人嘅感覺,佢好叻,單單演講幾句,已經迷住我,我要嫁呢個人,大部分女人都鍾意才華嘅男人,當你鍾意嘅時候都已經唔記得咗佢幾多歲啦!」