傳曾志偉做直播唔收百萬酬勞　開「特別條件」有洋葱

藝人網上平台直播賣貨風氣持續，當中影帝曾志偉早前直播賣酒，銷售額去到約1,440萬人民幣（約1,592萬港元），成績理想，仲有唔少公司開出天價同按業績抽成等方式想搵佢合作，但今日有消息指曾志偉開出「特別條件」，背後原因竟然有洋葱！

佢近半年幾乎都留喺上海工作，日前佢受邀上直播幫廠商賣貨，據悉廠商出價一啲都唔手軟，不但開出百萬人民幣酬勞，更加畀佢按業績抽成，對曾志偉嘅知名度同人氣都鬼咁有信心。

有台灣媒體指，甚少接觸直播嘅曾志偉，唔收廠商嘅百萬酬勞，但開出另一個接Job條件，就係要求團隊要用佢嘅人。有指團隊成員係過去佢喺無綫嘅工作夥伴，其中多數人因為疫情關係遭到裁員，因此曾志偉希望借直播賣貨，令團隊成員可以繼續工作謀生，真係唔話得。