讚麥大力揸飛機叻　謝嘉怡被封東莞小姐：阿爸有玩我冇

2020香港小姐冠軍謝嘉怡，是《衝上雲霄大選》星級評判團之一。問評分標準？她說：「睇吓佢哋嘅才能同整體表現，我聽啲人講佢哋好有才能，唱歌跳舞都好叻，好開心可以現場睇到佢哋表演，（對機師特別有幻想？）呢幾日都有見過佢哋，麥大力佢做機師好叻，（特別鍾情混血兒？）可能，佢人好好，佢同我講嘢一樣嘅，大家同聲同氣，（揀佢做男友？）唔好啦，我又唔係搵緊男朋友，不過覺得佢好有型，（男友唔使有型？）都係呀！總之性格最重要。」

談及自去過同鄉會之後被封「東莞小姐」？她說：「我同爸爸去咗一次，同啲人影相影咗5分鐘左右，我都唔知乜嘢嚟，嗰啲係姑媽朋友，（畀人叫『東莞小姐』？）吓！我係香港小姐，冇參加過嗰個選舉，爸爸社交網好活躍，佢有玩我冇，唔知佢甫乜嘢相，（甫相會話你知？）佢唔會同我講，但係我唔介意佢甫我啲嘢，冇所謂。」