【有片】G.E.M.收男友近80萬豪禮　即場感動爆喊

歌手鄧紫棋（G.E.M.）與造型師男友Mark（魏俊傑）屢傳婚訊，成日孖住周圍去形影不離，絕對係Sweet爆典範。尋日Boxing Day，G.E.M.仲自爆收到Mark嘅大禮，原來Mark送咗一台市價約78萬港幣嘅斯坦威鋼琴，佢仲冧到一秒落淚，真情流露。

G.E.M.指自己上周去琴行睇中一台斯坦威（Steinway）型號B211嘅三角演奏琴，但價錢係佢原本想買嘅琴嘅20倍：「對於一個考完駕照卻連一輛車都沒捨得買的我，這台琴實在有點太貴重…」考慮好幾日之後佢實在太鍾意，就決定好遲啲買返屋企。

點知佢同親朋好友玩交換禮物時，G.E.M.小心翼翼地剪開Mark送嘅禮物包裝後，就見到一條鑰匙，佢仲呆晒狂問大家係咩嚟，得知係收到佢最愛嘅鋼琴後，即刻嚇到彈起，又拍手又轉圈咁，最後更加感動到爆哭：「這可是我收過最驚喜的禮物了。」得喇，知喇，係人都知男友錫晒你喇！