【全城集氣】馬國明冧莊視帝　湯洛雯承諾結婚

視帝馬國明去年6月被東網斷正同湯洛雯（靚湯）拍拖，半年來仲經常上女友香閨，實行半同居試婚！有傳馬國明求婚成功兼今年拉埋天窗嘅佢哋，最近又被東網影到去視察位於馬鞍山嘅新婚愛巢，有晒結婚迹象！

而踏入2021年後，靚湯喺社交網寫道：「2021快樂！」不過睇真啲，右下角有幾行細字：「既然你哋咁想，如果，我係話如果呀吓，佢今年冧莊（視帝），就結啦?」有網民問佢：「我cap咗圖㗎喇，為拉票定為結婚先？」仲有好多人話因為咁要投票畀馬國明，仲話要集氣：「馬國明一定攞硬最佳男主角，2021靚湯結硬婚！」、「期待你穿婚紗的照片！」、「靚湯你記得兌現呀！」，仲紛紛恭喜定佢，叫佢唔好走數呀！

靚湯有冇得找數？真係要睇彩數，不過「明湯」接受東網訪問時，就繼續冤氣，靚湯話：「佢攞到咪認真考慮囉，但係今年對手都好強嘅，咁作為佢身邊人當然支持佢！」叫馬國明開Post拉票？佢再話：「其實都要睇番大家實力嘅，攞獎項呢啲係講天時地利人和，到時咪知囉！」而馬國明就話：「其實因為佢知我應該攞唔到先講笑……希望大家新嘅1年開開心心……」